Հ. Թովմասյան. «Հայաստանում դատապարտյալների թիվը հասել է 4700-ի»

«Արմավիր» ՔԿՀ-ի շինհրապարակ կատարած այցի ժամանակ ՀՀ արդարադատության նախարար Հրայր Թովմասյանն անդրադարձել է ազատազրկման վայրերի գերբեռնվածությանը:

Ըստ նրա՝ ՔԿՀ նոր շենքի կառուցումն զգալիորեն կլուծի այդ խնդիրը: Ի դեպ, գերբեռնվածության հարցը բնորոշ է և ամբողջ տարածաշրջանին, և ԱՄՆ-ին:

«Մեզանում անցած տարվա համաներումից հետո էապես նվազել է խնդիրը: Այն ժամանակ ունեինք 5400-5500 դատապարտյալ, հիմա նրանց թիվը 4600-4700 է»: Նախարարի խոսքով՝ գերբեռնվածության խնդիրը հիմնականում առկա է մեկուսարաններում: Կիսաբաց հիմնարկներում խնդիրն այնքան էլ սուր չէ: Այժմ ամենածանրաբեռնվածը Նուբարաշեն ՔԿՀ-ն է: Սակայն այս փաստը չի ենթադրում, թե հենց Նուբարաշենից են դատապարտյալներ տեղափոխելու նոր կառուցվող շենք:

«Գոյություն ունի հանձնաժողով, որի կազմը հաստատում է Արդարադատության նախարարը, ելնելով տասնյակ գործոններից՝ հանձնաժողովը որոշելու է դատապարտյալների տեղաբաշխումը»:

Լրագրողների այն դիտարկմանը, թե բազմաթիվ հասարակական կազմակերպություններ ահազանգում են դատապարտյալների՝ ոտքի վրա քնելու մասին, Հ. Թովմասյանը նշեց.«Ոտքի վրա ոչ ոք չի կարող քնել, նման բան չկա»:

Թեև նոր կառուցվելիք ՔԿՀ-ն գերբեռնվածության խնդրին լուծում կտա, սակայն միայն նման շենքեր կառուցելով խնդրի ամբողջական լուծումը հնարավոր չէ, քանի որ դա պայմանավորված է այլ գործոններով ևս:

«Մի շարք հանցակազմեր պետք է ապաքրեականացնենք, ինչը նախատեսված է 2012-2016թթ. դատաիրավական բարեփոխումներով: Ոչ միշտ է, որ ազատազրկման ձևով պատիժը լավագույն միջոցն է: Հատկապես տնտեսական հանցագործություններում ազատազրկման ձևով պատժից միգուցե էականորեն ձերբազատվենք: Հաջորդը պայմանավորված է կալանքը որպես խափանման միջոց համեմատաբար քիչ կիրառելու հետ»,- մասնավորապես նշել է նախարարը:

Աղբյուրը` «Փաստինֆո» գործակալություն