«Հայկական Ժամանակ». Բա ուր մնաց Ձե՛ր շնորհքը

«Էրեբունի-Երևան-2794» տոնակատարության կազմակերպիչները վերջին օրերին առիթը բաց չեն թողնում հայտարարելու, որ հոկտեմբերի 14-ին նախատեսված տոնական միջոցառումներն անցկացվելու են մեծ շուքով, բազմաբնույթ ու բազմաբովանդակ հանդիսություններով՝ մայրաքաղաքում տեղադրվելիք 26 բեմահարթակներում։

Այս շքեղությունների մեջ, սակայն, չի մտնում քաղաքային ֆոլկլորը, ինչն էլ հարուցել է այս ժանրում կատարողների՝ Վախթանգ Հարությունյանի և Լիլիթ Պիպոյանի զայրույթը։ Վախթանգ Հարությունյանը երեկ թերթի հետ զրույցում ասաց. «Հեռուստատեսությամբ լսեցի, որ «Էրեբունի-Երևան-2794» տոնակատարության շրջանակներում լինելու է 26 հարթակ՝ բոլոր ժանրերի համար, սակայն, տոնակատարության կազմակերպիչներից ոչ ոք ոչ մի տեսակ հրավեր չի կատարել և ոչ մի հեղիանակային կատարողի, ինչը վատ է, քանի որ քաղաքային ֆոլկլորը շատ կարևոր դեր և նշանակություն ունի քաղաքի համար։ Նամակ հղեցինք Երևանի քաղաքապետ Տարոն Մարգարյանին և հույս ունեի, որ վրիպակը կուղղվի։ Դրանից հետո հայտարարվեց, որ Մոսկովյան պուրակում մի հարթակ կա, որն ազատ է, և կարող ենք այնտեղ մասնակցել։ Ես դա հրավեր չեմ համարում, այլ անտեսված վերաբերմունք։ Ես չեմ կարծում, որ մնացած 25 հարթակների կատարողներին և խմբերին նրանք այդպես են վերաբերել»։

Իսկ ահա Լիլիթ Պիպոյանը Ա1+–ի հետ զրույցում ասել էր. «Ոնց կարող է հեղինակային երգը հարթակ չունենալ, և ովքեր են լինելու մեր փոխարեն, ազատ վարքագծով ինչ–որ ռուսական պոպ–աստղեր»։

Ինչո՞ւ են անտեսվել հեղինակային կատարողները, ինչո՞ւ նրանց չի տրամադրվել, և արդյո՞ք առաջիկայում նրանց հատուկ հրավեր կլինի։ Մեր այս հարցերին երեկ պատասխանեց Երևանի քաղաքապետարանի հասարակայնության հետ կապերի և լրատվության բաժնի պետ Արթուր Գևորգյանը. «Իսկ ո՞վ ասաց, որ նրանց հարթակ չի տրամադրվել, «Էրեբունի–Երևան–2794» տոնակատարություններից և ոչ ոք անմասն չի մնա։ Մեր հարթակների ցանկում կա պոեզիայի հարթակ, որտեղ ցանկացած մարդ, ով ստեղծագործելու կարողություն ունի կամ ցանկություն ունի հանրությանը ներկայացնելուիր շնորհքը, կարող է օգտվել այդ հարթակից՝ լինի նա ասմունքող, բանաստեղծ, թե երաժիշտ»։

Փաստորեն, քաղաքապետարանում Լիլիթ Պիպոյանին համարում են «ստեղծագործելու կարողություն ունեցող» մարդ և հերթապահ հարթակը մեծահոգաբար առաջարկում են՝ «իր շնորհքը» հանրությանը ներկայացնելու համար։