Ռուսաստան. Թուրքիայում առգրավված ինքնաթիռում ռուսական զենք չի եղել

Թուրքիայում Մոսկվայից Դամասկոս թռչող կալանքի տակ առնված սիրիական ինքնաթիռում չի եղել ռուսական զենք-զինամթերք. այդ մասին Интерфакс-ին հայտնում է զենքի արդյունաբերությամբ զբաղվող համակարգի բարձրաստիճան պաշտոնյաներից մեկը:

Նրա խոսքերով՝ եթե Ռուսաստանը ցանկանար զենք արտահանել Սիրիա, ապա դա կաներ նախատեսված կարգով, ոչ թե անօրինական ճանապարհով, այն էլ՝ քաղաքացիական ինքնաթիռի միջոցով: Նա հիշեցրել է, որ Մոսկվան չի դադարեցրել Դամասկոսի հետ իր ռազմա-տեխնիկական համագործակցությունը:

Հիշեցնենք, որ Syrian Air ավիաընկերության A-320 օդանավը հոկտեմբերի 10-ին կալանքի տակ էր առնվել, պատճառաբանելով, որ ինքնաթիռի մեջ «քաղաքացիական ավիաընկերության պահանջներին չհամապատասխանող բեռ է եղել»:

Ուղեբեռի առգրավումից հետո ինքնաթիռը շարունակել է չվերթը: Ինքնաթիռի 35 ուղևորներից 17-ը, չճշտված տվյալներով, Ռուսաստանի քաղաքացիներ են. հայտնում է Lenta.ru-ն: