Սիրիան խնդիր ունի թուրքական կառավարության հետ, ոչ թե՝ թուրք ժողովրդի. Բաշար Ասադ

Սիրիան խնդիրներ չունի թուրք ազգի հետ, այդ խնդիրներն առկա են կառավարության հետ. հայտարարել է նախագահ Բաշար Ասադը: Այս մասին տեղեկացնում է Риа Новости-ն:

«Մենք ոչ մի խնդիր չունենք թուրք ժողովրդի և զինվորների հետ: Սիրիան թշնամանք չի ցուցաբերել Թուրքիայի նկատմամբ, միշտ եղբայրական հարաբերություններ է պահպանել նրա հետ: Մենք խնդիրներ ունենք թուրքական կառավարության հետ, որի դիրքորոշման պատճառով ստիպված ենք խնդիրներ ունենալ թուրքական սահմանին»,-ասել է նախագահ Ասադը:

Հիշեցնենք, որ Թուրքիայի և Սիրիայի միջև հարաբերությունները լարվել էին հոկտեմբերի 3-ին Աքչաքալ թուրքական սահմանային քաղաքում սիրիական կողմից արձակած արկի պայթյունից հետո, որի արդյունքում զոհվել էր 5 մարդ: Դրան ի պատասխան՝ թուրքական կառավարությունը Թուրքիային միջսահմանային ռազմական գործողություններ իրականացնելու մեկ տարվա լիազորություններ շնորհեց:

«Դեռևս սիրիական հակամարտության առաջին օրերին մենք հայտնել էինք, որ չեն բացառվելու սադրանքները: Այժմ տեղի է ունենում այն, ինչի մասին մենք խոսում էինք»,-նշել է Ասադը, հավելելով, որ նման իրավիճակում առաջացած սխալները կարգավորվում են բանակցությունների միջոցով:

Նախագահի խոսքերով՝ Սիրիան պատասխանատվություն չի կրում պաշտոնական Անկարայի հետ բանակցությունների բացակայության համար: Նախագահը նշել է, որ Աքչաքալի միջադեպի շուրջ հետաքննություն է տարվում՝ պարզելու համար՝ այն տեղի է ունեցել ընդդիմության պատճառով, թե կառավարական զորքերի արկն է սխալ թիրախի բախվել: Անհրաժեշտ է միասնական փորձաքննություն վարել երկու կառավաությունների համագործակցությամբ՝ կարծում է Սիրիայի նախագահը: