Ռուսաստանը բացատրություն է պահանջում Թուրքիայից

ՌԴ ԱԳՆ պաշտոնական ներկայացուցիչ Ալեքսանդր Լուկաշևիչը հոկտեմբերի 11-ին հայտարարել է, որ Մոսկվան բացատրություն է պահանջում Թուրքիայից իր քաղաքացիների նկատմամբ ցուցաբերած ոչ պատշաճ վերաբերմունքի համար:

Գերատեսչության կայքում նրա հրապարակած մեկնաբանության մեջ ասված է, որ Անկարայում սիրիական ինքնաթիռի առգրավման ժամանակ թուրքական կողմը խախտել է երկկողմ հյուպատոսական կոնվենցիան՝ թույլ չտալով ռուս հյուպատոսին հանդիպել ինքնաթիռում գտնվող ռուս ուղևորների հետ:

Լուկաշևիչն անհանգստություն է հայտնել նաև այն հարցի շուրջ, որ սիրիական ինքնաթիռի հարկադիր վայրէջքը կարող էր սպառնալ ուղևորների, այդ թվում՝ Ռուսաստանի 17 քաղաքացիների, կյանքին ու անվտանգությանը:

Ռուսաստանի ԱԳՆ զայրույթը շարժել է այն հանգամանքը, որ կատարվածի մասին ՌԴ-ն տեղեկացել է ԶԼՄ-ներից, ոչ թե՝ թուրքական իշխանություններից:

Պաշտոնական Անկարան ոչ մի կերպ չի արձագանքել Լուկաշևիչի այդ մեկնաբանությանը: Իսկ Թուրքիայի ԱԳ նախարար Ահմեդ Դավութօղլուն ավելի վաղ հայտարարել էր, որ ուղևորների նկատմամբ ցուցաբերվում է բարեհամբույր վերաբերմունք:

Հիշեցնենք, որ  Թուրքիայի ռազմաօդային ուժերի միջոցով սիրիական A-320 ինքնաթիռը հարկադիր վայրէջք էր կատարել Անկարայում՝ օդանավում զենքի առկայության կասկածների պատճառով:

Օդանավի խուզարկությունը շարունակվել է 5 ժամ, որի արդյունքում թուրքական կողմը հայտարարել է, որ ինքնաթիռի մեջ ռազմական նպատակներով օգտագործվող պարագաներ են հայտնաբերվել: Դրանից հետո ինքնաթիռը շարունակել է թռիչքը, սակայն օդանավի ուղեբեռն առգրավվել է: