Տիգրան Սարգսյան. 140 մլն դրամի անարդյունավետ ծախս Առողջապահության նախարարությունում

Այս անգամ վարչապետ Տիգրան Սարգսյանն առողջապահության նախարարությունում է՝ իր իսկ հրավիրած խորհրդակցությանը, որին մասնակցում էին ոլորտի պատասխանատուներ: Վարչապետի վերահսկողական ծառայության կատարած ուսումնասիրությունների արդյունքում բացահայտվել են փաստեր, ըստ որոնց՝ պետական միջոցների հաշվին կատարվել է 84 մլն. 200 հազար դրամի գնումներ և ավելի քան 140 մլն դրամի անարդյունավետ ծախս, և սա ընդամենը 2 անուն դեղերի մասով:

Առողջապահության նախարարության կողմից 2009 թվականից կենտրոնացված կարգով ձեռք է բերվել «Քսելոդա» տեսակի դեղորայք, որն ուռուցքաբուժության բնագավառում լայն կիրառում ունի: Նախարարությունը 2009 թվականին իրականացրել է նշված դեղորայքի 4 գնում, ընդ որում, հունիսին մեկ դեղահաբի գնման արժեքը կազմել է 2670 դրամ, իսկ սեպտեմբերի, նոյեմբերի և դեկտեմբերի գնումներով՝ 1875 դրամ:
Պարզվել է նաև, որ նախարարության կողմից կենտրոնացված կարգով ձեռք բերված դեղորայքի գինն ավելի բարձր է հիվանդանոցի կողմից ուղղակիորեն գնված միևնույն դեղորայքի գնից:

Որոշ դեպքերում պետական միջոցները խիստ անհրաժեշտ դեղերի ձեռքբերմանն ուղղելու փոխարեն ուղղվել են չհիմնավորված գնումներին:
Վարչապետը դժգոհություն է հայտնել, առողջապահության նախարար Դ. Դումանյանն էլ խոստացել է իր ղեկավարած ոլորտում կարգ ու կանոն հաստատել: