Կոնգրեսականները պահանջել են Պետդեպից՝ մեծացնել ԱՄՆ–ի կողմից Ղարաբաղին տրվող օգնությունը

ԱՄՆ-ի ներկայացուցիչների պալատի անդամներ Ֆրենկ Փալոուեն և Ադամ Շիֆը հանդիպել են ԱՄՆ-ի պետքարտուղարի Եվրոպայի եւ Եվրասիայի հարցերով տեղակալ Ֆիլիպ Գորդոնի հետ՝ քննարկելու Հայաստանի եւ Լեռնային Ղարաբաղին առնչվող հարցեր։ Այս մասին հաղորդում է ԱՄՆ-ում լույս տեսնող «Asbarez» թերթը։

Ըստ թերթի՝ հանդիպման ժամանակ կոնգրեսականները կարեւորել են Միացյալ Նահանգների համար հայկական համայնքի դերը և Վաշինգտոնի կողմից Հայաստանին աջակցություն ցուցաբերելու անհրաժեշտության մասին՝ որպես ԱՄՆ–ի վստահելի դաշնակից երկիր։ 

Կոնգրեսականներն իրենց մտահոգությունն են հայտնել Ադրբեջանի ագրեսիվ դիրքորոշման վերաբերյալ և կարեւորել Լեռնային Ղարաբաղի խնդրում ԱՄՆ-ի աջակցությունը։

«Հայաստանը կարեւոր դաշնակից է ԱՄՆ–ի համար և Միացյալ նահանգների քաղաքականությունը պետք է արտացոլի այդ հարաբերությունների կարևորությունը։ Հայաստանի խնդրով զբաղվող հանձնաժողովը պետք է շարունակի պայքարը Հայաստանին եւ Լեռնային Ղարաբաղին տրվող արտաքին օգնությունը բարձր մակարդակի վրա պահելու, Հայոց ցեղասպանության պաշտոնական ճանաչման, ինչպես նաեւ Միացյալ նահանգներում ապրող ամերիկահայ համայնքի խնդիրների վրա ավելի մեծ ուշադրություն դարձնելու առումով։ Պետդեպարտամենտը պետք է իմանա, որ անհրաժեշտ է ավելի լուրջ քայլեր ձեռնարկել այդ ուղղությամբ», - նշվում է կոնգրեսականների կողմից արված հայտարարությունում։

«Անհրաժեշտ է, որ Միացյալ նահանգները պաշտպանի Արցախի ժողովրդի իրավունքները Լեռնային Ղարաբաղի ինքնորոշման ճանապարհին», - ասել է կոնգրեսական Ադամ Շիֆը՝ ավելացնելով, որ «ԱՄՆ–ը ոչ միայն ուղղակի լրացուցիչ ռեսուրսներ է տրամադրում Լեռնային Ղարաբաղին, այլև օգնում է Ղարաբաղի ժողովրդին հաղթահարել մարդասիրական ճգնաժամը՝ Ադրբեջանի ու Թուրքիայի կողմից շրջափակման պայմաններում, ինչպես նաև օգնում է տարածաշրջանի կայունացման գործընթացին՝ ապացուցելով հավատարմությունը Լեռնային Ղարաբաղի հակամարտության խաղաղ կարգավորման գործընթացում»։