Ուսանողական արձակուրդ` հետաքրքիր և օգտակար

ՀՀ ԱԻՆ Ճգնաժամային կառավարման պետական ակադեմիայի մի խումբ ուսանողների համար այս ամառային արձակուրդներն անցել են ակտիվ ուսումնական գործընթացի պայմաններում: Նրանց մի մասը, քննաշրջանի ավարտից հետո, մասնակցել են ուսուցողական դասընթացների, որոնք կազմակերպվել էին «Էկո Փիս» ՀԿ կողմից:

Դասընթացներն անցկացվել են «Աջակցություն արտադրական անվտանգության վերաբերյալ գիտելիքների հարստացմանը բարձրագույն ուսումնական հաստատություններում» ծրագրի շրջանակներում, որը ֆինանսավորվում է Գերմանիայի բնության, շրջակա միջավայրի պահպանության և միջուկային ռեակտորների անվտանգության ֆեդերատիվ նախարարության կողմից: Ակադեմիայի ուսանողներից բացի' դասընթացներին մասնակցել են նաև այլ ԲՈՒՀ-երի ուսանողներ:

Դասընթացների նպատակն էր ուսանողներին ծանոթացնել արտադրական գործընթացների, դրանց հնարավոր էկոլոգիական ռիսկերի, արտադրական անվտանգության հարցերի և այս ոլորտում ազգային ու եվրոպական փորձի հետ: Տեսական դասընթացները զուգորդվել են գործնական պարապմունքների հետ։ «Էկո Փիս» ՀԿ-ի շնորհիվ ակադեմիայի ուսանողները հնարավորություն են ունեցել ամռանն այցելելու 2 արտադրական ձեռնարկություն' Լոռու մարզի Ալավերդու պղնձաձուլական գործարան և Սյունիքի Զանգեզուրի պղնձամոլիբդենային կոմբինատ: Այնտեղ ուսանողները ծանոթացել են այս ձեռնարկություններում իրականացվող աշխատանքներին, տեխնոլոգիական գործընթացներին, սարքավորումներին, անվտանգության և ավտոմատացման համակարգերին և անհրաժեշտ փաստաթղթերին: Ուսանողները հնարավորություն են ունեցել նաև աշխատել ստուգիչ թերթիկներով, որոնք հնարավորություն են տալիս գնահատելու արտադրական ձեռնարկությունների վթարավտանգավորության աստիճանը:

Զանգեզուրի պղնձամոլիբդենային կոմբինատի հետ ծանոթությունը սկսվել է հանքից, որտեղ ուսանողներն ականատես են եղել հանքաքարի պայթեցման և տեղափոխման գործընթացներին: Նրանք այցելել են նաև ջարդման, ինքնամանրացման, ֆլոտացման, պղնձի և մոլիբդենի խտանյութերի զտման և չորացման արտադրամասեր, ինչպես նաև քիմիական լաբորատորիա և ռեկուլտիվացված պոչամբարների տարածքներ: Գործարանի աշխատակիցների ուղեկցությամբ ուսանողներն այցելել են Արծվանիկի գործող պոչամբար, որը գտնվում էր կոմբինատից շուրջ 35 կմ հեռավորության վրա: Հարկ է նշել, որ Արծվանիկի պոչամբարը դասվում է աշխարհի խոշորագույն պոչամբարների շարքին:

Համատեղելով օգտակարը հաճելիի հետ, «Էկո Փիս» ՀԿ նախաձեռնությամբ ուսանողական խումբը եղել է նաև Լոռու և Սյունիքի մարզերի տեսարժան վայրերում: Ուսանողները շնորհակալություն են հայտնում ծրագրի ղեկավար Քրիստինե Սահակյանին, դասընթացները վարող բոլոր մասնագետներին, բուհերի և արտադրական ձեռնարկությունների ղեկավարությանն ու աշխատակիցներին' աջակցության, ջերմ ընդունելության և արտադրական պրակտիկան պատշաճ մակարդակով կազմակերպելու համար: