Կայացավ «Մշակույթ» ծրագրի առաջին տարածաշրջանային համաժողովը

2012 թ. հոկտեմբերի 8-9-ը Վրաստանի Հանրապետությունում կայացել է Եվրոպական միության Արևելյան գործընկերության «Մշակույթ» ծրագրի առաջին տարածաշրջանային համաժողովը, որը կազմակերպվել էր Եվրոպական միության տարածա­շրջանային մոնիթորինգի և կարողությունների կառուցման խմբի կողմից: Համաժողովին մասնակցում էր Եվրոպական միության անդամ երկրների և Արևելյան գործընկերության 6 պետությունների ավելի քան 120 ներկայացուցիչ: Հայաստանի Հանրապետության պատվիրակությունը ղեկավարում էր ՀՀ մշակույթի նախարարի տեղակալ Արև Սամուելյանը: Մասնակցում էին նաև ծրագրի շրջանակներում իրականացվող մի շարք նախագծերում ընդգրկված հայաստանյան հասարակական կազմակերպությունների ներկայացու­ցիչներ: Կոնֆերանսի մասնակիցներին ողջունել են Վրաստանի մշակույթի և հուշարձանների պաշտպանության նախարարության, Եվրոպական հանձնա­ժողովի, Վրաստանում ԵՄ պատվիրակության ներկայացուցիչները: Համաժողովի նպատակն էր Եվրոպական միության անդամ երկրների և Արևելյան գործընկերության 6 պետությունների (Հայաստան, Վրաստան, Ուկրաինա, Բելառուս, Մոլդովա, Ադրբեջան) պետական, մասնավոր, քաղաքացիական հասարակության, անկախ մասնագետների ներկայացուցիչների մասնակցությամբ քննարկել տարածա­շրջանում տարվող մշակութային քաղաքականու­թյունների հետ կապված խնդիրները, ինչպես նաև Լայն շրջանակներին ներկայացնել Արևելյան գործընկերության «Մշակույթ» ծրագիրը, դրա տարածաշրջանային ասպեկտը և գործունեությունը, Երկխոսություն հաստատել Արևելյան գործընկերության երկրների մշակութային քաղաքականություններ և ռազմավարություններ մշակող պետական ու մասնավոր սեկտորների ներկայացուցիչների միջև, ներկայացնել ծրագրի փորձագետների կողմից 2012 թ. Արևելյան գործընկերության երկրների մշակույթ և մշակութային քաղաքականության սեկտորներում իրականացրած անալիտիկ բազային վերլուծության արդյունքները:

Օրակարգում ընդգրկված էր 2 պանելային քննարկում. 1-ին քննարկման թեման կրում էր «Ինչու՞ մշակույթ» խորագիրը, որի շրջանակներում մասնակիցները համառոտ ներկայացրել են իրենց երկրների կողմից տարվող մշակութային քաղաքականությունը, գերակայու­թյունները և պետություն–մասնավոր հատված փոխհարա­բերու­թյուն­ները, նրանց միջև երկխոսության ակտիվացման հեռանկարներն ու դրան ուղղված գործողությունները: Քննարկմանը մասնակցում էր ՀՀ մշակույթի նախարարի տեղակալ Ա. Սամուելյանը: 2-րդ քննարկման թեման էր՝ «Որո՞նք են փոփոխության գործընթացները», որին մասնակցում էր Արվեստի քննադատության ազգային ասոցիացիայի նախագահ Նազարեթ Կարոյանը:

Համաժողովի քննարկումների արդյունքում մշակվել է «Պաշտոնական հաղորդագրություն», որը վերջնական տարբերակով կներկայացվի մասնակիցներին: Կոնֆերանսին զուգահեռ բացվել է նաև Արևելյան գործընկերության «Մշակույթ» ծրագրում ընդգրկված դրամաշնորհային նախագծերը ներկայացնող և մեկնաբանող ցուցահանդես: Հայաստանն իր ներգրավվածությամբ համարվելով տարածաշրջանի ամենակտիվ երկիրը՝ ընդգրկված է մի շարք նախագծերում: