Սաֆարովի դեպքը պետք է համընդհանուր դատապարտության արժանանա. Գարեգին Երկրորդ

Հոկտեմբերի 11-ին Մայր Աթոռ Սուրբ Էջմիածնում Ն.Ս.Օ.Տ.Տ. Գարեգին Բ. Ծայրագույն Պատրիարք եւ Ամենայն Հայոց Կաթողիկոսն ընդունեց Սլովակիայի Գերագույն դատարանի նախագահ Շտեֆան Հարաբինի գլխավորած պատվիրակությանը՝ ուղեկցությամբ ՀՀ վճռաբեկ դատարանի նախագահ Արման Մկրտումյանի, ՀՀ Արմավիրի մարզպետ Աշոտ Ղահրամանյանի եւ Սլովակիայի հայ համայնքի նախագահ Աշոտ Գրիգորյանի:

Ողջունելով հյուրերին՝ Նորին Սրբությունը գոհունակություն հայտնեց երկու երկրների դատական կառույցների միջեւ ձեւավորած սերտ համագործակցության համար: Զրույցի ընթացքում Վեհափառ Հայրապետը իր գնահատանքն ու օրհնությունը փոխանցեց Սլովակիայի իշխանություններին՝ Սլովակիայում ապրող հայորդիների նկատմամբ դրսեւորած բարիացակամ վերաբերմունքի համար: Վեհափառ Հայրապետը նաեւ ողջունեց Սլովակիայի իշխանությունների ցուցաբերած զորակցությունը հայ ժողովրդին եւ նրա վճռական կեցվածքը Հայոց ցեղասպանության ընդունման եւ դատապարտման հարցում:

Հանդիպման ընթացքում անդրադարձ կատարվեց նաեւ Հունգարիայի իշխանությունների կողմից սպա Ռամիլ Սաֆարովի՝ Ադրբեջանին արտահանձնման խնդրին: Այս առնչությամբ Վեհափառ Հայրապետը նշեց, որ նման երեւույթները՝ իբրեւ ազգատյացության քարոզչություն, համընդհանուր դատապարտության պետք է արժանանան, հակառակ դեպքում՝ ցավալի անդրադարձ կարող են ունենալ մարդկային կյանքում: