Հայաստանը տնտեսական դրական «դոպինգի» տակ է, բայց կան լրջագույն մարտահրավերներ․ Մանասերյան

«Աշխարհաքաղաքական վերջին իրադարձությունները դրական որոշակի աշխուժություն են մտցրել ՀՀ տնտեսության մեջ․ խոսքն առաջին հերթին ոչ տուրիստական նպատակներով մեր երկիր ժամանած շուրջ 200 հազար քաղաքացիների մասին է, որոնց շնորհիվ աճել է տեղական ապրանքների սպառումը, բարձրացել առևտրաշրջանառությունը, որոշակի աշխուժություն կա անշարժ գույքի շուկայում և այլն»։

Մեկնաբանելով հայաստանյան էկոնոմիկայի վրա ռուս-ուկրաինական պատերազմի հնարավոր ազդեցությունները՝ ԼՈՒՐԵՐ․com-ի հետ զրույցում այսպիսի տեսակետ հնչեցրեց տնտեսագիտության դոկտոր Թաթուլ Մանասերյանը։

Նրա բնորոշմամբ, Հայաստանն այս պահին տնտեսական առումով «դրական դոպինգի տակ» է։ 

«Իշխանությունները պետք է ազնվություն ունենան և ասեն, թե ինչի հաշվին է այդ տնտեսական աշխուժությունը։ Միաժամանակ, լրջագույն մարտահրավերներ կան, քանի որ տնտեսական սպառնալիքների դաշտն ամբողջությամբ ուսումնասիրված չէ», - նշեց մեր զրուցակիցը։

Մանասերյանի խոսքով,  ռուս-ուկրաինական պատերազմը չի կարող հավերժ տևել, հետևաբար՝ իշխանությունները պարտավոր են լրջորեն ուսումնասիրել և մասնագիտական պատշաճ գնահատականներ տալ տնտեսության մարտահրավերներին։

«Հայաստանն, ի վերջո, վճարելու է խաղաղության գինը, այնպես որ՝ պետք է դուրս գալ «տնտեսական թմբիրից» և առավել խորքային վերլուծություններ անել»,-ընդգծեց տնտեսագետը։

Զրուցեց ՝ Արա Ալոյանը