Սիրիայում շարունակվում են բռնությունները, աճում է զոհերի քանակը

Նախորդ օրը Սիրիայում բռնությունների զոհ է դարձել նվազագույնը 210 մարդ. հայտնում է Радио Свобода-ն։

Դամասկոսի կենտրոնում, որտեղ տեղակայված են անվտանգության ծառայության և պետության ռազմական գերատեսչության շենքերը, հինգշաբթի տեղի է ունեցել մեծ պայթյուն։ «Ահֆադ ալ-Ռասուլ» և «Անսար ալ-Իսլամ» խմբավորումները միասնական հայտարարությունում հաղորդել են, որ նրանց անդամները պայթուցիկ սարքը գործի են դրել Ումայյադ հրապարակում։ Սիրիայի պետական հեռուստատեսությունը կատարվածը ահաբեկչություն է որակել և հայտնել, որ վիրավորվել է 2 մարդ։

Դաժան մարտեր էին ընթանում Մաարեթ ալ-Նուման քաղաքի մերձակայքում՝ պետության հյուսիսում։ Ապստամբների տվյալներով՝ երեք օրվա ընթացքում քաղաքում զոհվել է ավելի քան 300 մարդ։