ԱՄՆ-ը քաջալերել է սիրիական ինքնաթիռը առգրավելու Թուրքիայի որոշումը

ԱՄՆ-ը հավանություն է տվել սիրիական ինքնաթիռը Անկարայում հարկադիր վայրէջքի ստիպելու Թուրքիայի որոշումը. հայտնում է Agence France-Presse-ը:

«Մենք լիովին պաշտպանում ենք այդ ինքնաթիռը խուզարկելու Թուրքիայի կառավարության որոշումը: Սիրիային ցանկացած տիպի զենքի մատակարարումը մեզ մոտ անհանգստություն է առաջ բերում»,-հայտարարել է Պետդեպարտամենտի պաշտոնական ներկայացուցիչ Վիկտորիա Նուլանդը:

Նա չի պարզաբանել, թե ինչ է հայտնաբերվել օդանավում, սակայն հույս է հայտնել, որ թուրքական կողմը կհայտարարի այդ մասին առգրավված բեռի հետաքննության ավարտից հետո:

Հիշեցնենք, որ ավելի վաղ ԱՄՆ-ի կառավարության փոխխոսնակ Ջոշ Էրնսթն իր հերթին հանդես է եկել այդ հարցում Թուրքիայի աջակցությամբ: Չնայած նա հստակ չի մեկնաբանել սիրիական ինքնթիռը հարկադիր վայրէջքի ստիպելու մասին Անկարայի որոշումը, այնուհանդերձ, հինգշաբթի օրը հայտարարել է, որ Վաշինգտոնը ամուր կանգնած է իր դաշնակցի կողքին, որը փորձել է խոչընդոտել Բաշար Ասադի ռեժիմին զենք մատակարարելու փորձը:

Դամասկոսն իր հերթին մեղադրել է Էրդողանին խաբեության մեջ. «Թուրքիայի վարչապետը մի շարք ստահոդ բացատրություններ է տվել՝ իր թշնամական վերաբերմունքը Սիրիայի հանդեպ արդարացնելու համար»,-հինգշաբթի օրը հայտարարել է Սիրիայի ԱԳՆ-ը Դամասկոսում, տեղեկացնում է Der Standard-ը: