«Մուսուլման եղբայրները» ջիհադի կոչ են անում Իսրայելի դեմ

Եգիպտոսում իսլամական «Մուսուլման եղբայրներ» շարժման գերագույն առաջնորդ Մուհամմեդ Բադիան մուսուլմաններին Երուսաղեմի իսլամական սրբությունները և Ալ Աքսա մզկիթը հետ վերադարձնելու համար ջիհադի կոչ է արել: Այս մասին հայտնում է Риа Новости-ն՝ հղում կատարելով շարժման առաջնորդի ուղերձին:

«Երուսաղեմի իսլամական սրբությունների վերադարձին հնարավոր չէ հասնել ՄԱԿ-ի միջանցքներում կամ բանակցությունների միջոցով, քանի որ Իսրայելը ընկալում է միայն ուժային մեթոդները»,-հայտարարել է Բադիան:

Նրա խոսքերով՝ իսրայելցիները չեն վերադարձնի իսլամական սրբությունները, եթե «չհարվածենք նրանց ձեռքերին», և դրանց վերադարձին կարելի է հասնել միայն ջիհադի միջոցով:

«Դա սրբազան պատերազմ է աշխարհի բոլոր մուսուլմանների համար, ոչ թե միայն արաբների: Մենք ջիհադի դրոշ ենք պարզում, և միայն դա կարող է կանգնեցնել նրանց հանդգնությունն ու իսլամական սրբությունների նկատմամբ ոտնձգությունը»,-հայտարարել է «Մուսուլման եղբայրների» առաջնորդը:

Շարժման պաշտոնական ներկայացուցիչ Մահմուդ Ղազլյանը նշել է, որ Բադիայի բարձրացրած հարցի էությունն այն է, որ մուսուլմանները պատրաստ են պաշտպանել իրենց իրավունքները, հողն ու սրբությունները և ձգտում են դրանք վերադարձնել խաղաղ ճանապարհով։ «Սակայն եթե այդ ուղղությամբ առաջընթաց չնկատվի, ապա մնում է դիմել ուժային մեթոդների»,-ավելացրել է Ղազլյանը: