Hurriyet. Թուրքիայի խորհրդարանը լիազորել է ռազմական գործողություններ իրականացնել

Հոկտեմբերի 11-ի ուշ երեկոյան Թուրքիայի խորհրդարանը ձայների մեծամասնությամբ ընդունել է կառավարության առաջարկը, այն է՝ երկարեցնել թուրքական բանակի լիազորությունները Հյուսիսային Իրաքում Քրդական աշխատավորական կուսակցության (PKK) անդամների դեմ սահմանային ռազմական գործողություններ իրականացնելիս, գրում է Hurriyet-ը: Դեմ են եղել միայն «Խաղաղություն և ժողովրդավարություն» կուսակցության (BDP) պատգամավորները:

«Սա պատերազմի առաջարկություն չէ, այս առաջարկությունն ընդունվել է խաղաղություն հաստատելու համար: Թուրքիայի անկեղծ ցանկությունն է Հյուսիսային Իրաքում անվտանգություն ապահովել: Մենք կցանկանայինք, որ քրդական շրջանային վարչությունը կանխեր իր տարածքից եկող վտանգն ընդդեմ Թուրքիայի, բայց նա չի իրականացրել նման գործողություններ», - հայտարարել է Թուրքիայի պաշտպանության նախարար Իսմեթ Յիլմազը խորհրդարանում ծագած վիճաբանությունների ընթացքում:

Խորհրդարանը լիազորել է սահմանային ռազմական գործողություններ իրականացնել Հյուսիային Իրաքում 2007թ. և երկարացրել է մանդատը ամեն տարի: Առաջարկությունը լիազորում է կառավարությանը որոշել ռազմական գործողությունների չափը, շրջանակը և ժամանակացույցը: Ներկայիս մանդատը լրանում է հոկտեմբերի 17-ին:

Իշխող «Արդարություն և զարգացում» (AKP) և «Ազգայնական շարժում» (MHP) կուսակցությունները ամբողջապես սատարել են առաջարկությունը: Հիմնական ընդդիմադիր Ժողովուրդների հանրապետական կուսակցությունը (CHP) ևս ընդունեց այն, սակայն որոշ վերապահումներով: «Խաղաղություն և ժողովրդավարություն» կուսակցությունը (BDP) կտրականապես դեմ է եղել՝ այն անվանելով «պատերազմի առաջարկություն»