Չարաշահումներ են հայտնաբերվել Մասիս քաղաքի թիվ 5 ավագ դպրոցի հիմնանորոգման աշխատանքներում

ՀՀ գլխավոր դատախազության պետական շահերի պաշտպանության վարչությունում հարուցվել է քրեական գործ' Մասիս քաղաքի թիվ 5 ավագ դպրոցի հիմնանորոգման աշխատանքների ընթացքում յուրացման եղանակով առանձնապես խոշոր չափերի գումար հափշտակելու, պաշտոնեական, ինչպես նաև կազմակերպության ծառայողի կողմից լիազորությունները չարաշահելու դեպքերի առթիվ: Այդ մասին տեղեկացնում են ՀՀ գլխավոր դատախազությունից:

Նախապատրաստված նյութերով պարզվել է, որ 2008-2010թթ. ընթացքում թվով 3 ՍՊ ընկերությունների կողմից Արարատի մարզի թիվ 5 ավագ դպրոցի հիմնանորոգման աշխատանքները կատարվել են քաղաքաշինական նորմերի խախտումներով:

Բացի այդ, կազմված նախահաշվային փաստաթղթերում, կատարողական և ավարտական ակտերում շինարարական աշխատանքների միավորների գները ավել հաշվարկվելու, կատարված աշխատանքների ծավալները հավելագրելու միջոցով յուրացման եղանակով հափշտակվել է առանձնապես խոշոր չափերի գումար:

Իսկ ՀՀ քաղաքաշինության նախարարության համապատասխան պաշտոնատար անձինք և հիմնանորոգման աշխատանքների կատարման նկատմամբ տեխնիկական հսկողություն իրականացնող ՓԲ ընկերության աշխատակիցները, չարաշահելով իրենց պաշտոնեական և առևտրային կազմակերպության ծառայողի լիազորությունները, ստորագրել են հավելագրումներով կազմված կատարողական և ավարտական ակտերը, հիմնանորոգման աշխատանքների՝ պայմանագրով նախատեսված տեխնիկական բնութագրին համապատասխան և պատշաճ կատարված լինելու մասին տվել դրական եզրակացություն:

Փաստի առթիվ հարուցվել է քրեական գործ՝ ՀՀ քրեական օրենսգրքի 179-րդ հոդվածի 3-րդ մասի 1-ին կետով, 214-րդ և 308-րդ հոդվածների 2-րդ մասերով:

Քրեական գործի նախաքննությունը հանձնարարվել է ՀՀ ոստիկանության քննչական գլխավոր վարչությանը: