Դպրոցները` ԱՌՆ կարևոր անկյունաքար

Հոկտեմբերի 12-ին՝ ՀՀ ԱԻՆ նիստերի դահլիճում մեկնարկեց Աղետների ռիսկի նվազեցման (ԱՌՆ) միջազգային օրվան նվիրված աշխատանքային քննարկում. «ԱՌՆ կրթության նորարարական մոտեցումները Հայաստանի հանրակրթական ուսումնական ծրագրերում» թեմայով։ Քննարկման կազմակերպիչներն են ՀՀ ԱԻՆ «Սեյսմիկ պաշտպանության ծառայություն» գործակալությունը, Ճապոնիայի միջազգային համագործակցության (ՃՄՀԳ) հետազոտական խումբը և ՄԱԿ-ի մանկական հիմնադրամը:

Սեմինարի ընթացքում քննարկվեցին հարցեր՝ Հայաստանում ու Ճապոնիայում աղետների վերաբերյալ կրթության, փորձի և դասերի փոխանակման, Հայաստանի դպրոցներում ակտիվ ուսուցանման խթանման ու դրա համար անհրաժեշտ գործողությունների վերաբերյալ:

Ողջույնի խոսքում ՀՀ ԱԻ նախարարի տեղակալ Հայկարամ Մխիթարյանը նշեց.

- Այսօր մենք կարևորում ենք աղետների ռիսկի նվազեցման ուսուցանումը դպրոցներում: 100-ից ավելի դպրոցականներ Սպիտակի երկրաշարժի ժամանակ զոհվեցին հենց դպրոցի մուտքի մոտ' չիմանալով երկրաշարժից պաշտպանվելու վարքականոնները:

Միանալով փոխնախարարի խոսքին' «ԱՌՆԱՊ» հիմնադրամի տնօրեն Մովսես Պողոսյանը հավելեց.
- Պետք է բարենպաստ պայմաններ ստեղծել աշակերտներին աղետներից պաշտպանվելու վարքականոնները սովորեցնելու համար: Դա բարդ խնդիր է, սակայն հաջողության հասնելու միակ ճանապարհը: Այս միջոցով մենք հերթական քարը կդնենք աղետակայուն երկիր կառուցելու ճանապարհին:

Ճապոնիայի միջազգային համագործակցության գործակալության հետազոտական խմբի ներկայացուցիչ Ֆումիկո Կանեկոն իր ելույթում ներկայացրեց իր հայրենիքում տեղի ունեցած աղետներից քաղված դասերը:

- Թե Հայաստանը, թե Ճապոնիան շատ աղետավտանգ երկրներ են: Ճապոնիայում, իհարկե, աղետների քանակը շատ ավելի մեծ է, քան Հայաստանում: Դրանց մեջ զգալի ունեն թայֆունները, որոնք Հայաստանում չեն լինում, սակայն Ճապոնիայում զոհերի թիվն անհամեմատ ավելի քիչ է քան Հայաստանում: Դա կապված է նրա հետ, որ Ճապոնիայում դեռևս 100 տարի առաջ ստեղծվել են շենքերի սեյսմակայունության հետ կապված նորմեր, իսկ 60 տարի առաջ ընդունվեց շենքերի սեյսմակայունության մասին օրենք: Այդ ամենի շնորհիվ Ճապոնիայում աղետների զոհերի քանակը տարեցտարի նվազում է: Մենք նաև շատ կարևոր տեղ ենք տալիս երեխաների պատրաստվածության բարձրացմանը' դպրոցներում աղետների վերաբերյալ պարտադիր առարկաներ ներառելով, ինչը շատ արդյունավետ է: Օրինակ' 2011 թ. Տոհոկու քաղաքում տեղի ունեցած ցունամին ավելի շատ մեծահասակների կյանքեր խլեց, քանի որ երեխաները պատրաստված էին, և տեսնելով, որ ալիքի բարձրությունը գերազանցում է պատվարի բարձրությանը' հեռացել էին այդ գոտուց, իսկ մեծահասակները, իրենց պաշտպանված զգալով, մնացել էին պատվարի հետևում: Այնուամենայնիվ, հենց երեխաներին էր հաջողվել նրանցից շատերին հասկացնել, որ դա վտանգավոր գոտի է' դրանով փրկելով շատերի կյանքը, - ասաց Ֆ. Կոնեկոն:

Աղետներից քաղված դասերի թեման շարունակեց ՀՀ ԱԻՆ «ՍՊՀսԾ» ՊՈԱԿ գործադիր տնօրեն Սերգեյ Նազարեթյանը.
- Ամենակարևորը վարքականոնների ուսուցանումն է ցածր դասարաններում: Մեր հասարակությունը չգիտի թե ինչ է իրենից ներկայացնում սեյսմիկ պաշտպանությունը, և այդ խնդրի լուծումը պետք է սկսել դպրոցներից: Ոչ պակաս կարևոր խնդիր է նաև շենքերի և շինությունների սեյսմակայունության հարցը: Սպիտակի երկրաշարժից հետո փլատակներում մնացած մարդկանց 65 տոկոսը մահացել էին: Այդ փլուզումների մոտ 10 տոկոսը եղել էր հենց բնակիչների պատճառով, քանի որ նրանք իրենց բնակարարններում չթույլատրված փոփոխություններ էին կատարել:

Սեմինարի ընթացքում եղան զեկույցներ' վերջին տարիներին կատարված աշխատանքների և դրանց արդյունավետության վերաբերյալ: Զեկույցներից մեկում Հայկական կարմիր խաչի աղետների պատրաստվածության ծրագրի ղեկավար Էդմոն Ազարյանը պատմեց աղետի ընտանեկան պլանի նոր մոդելի մասին.

- 14 տարի առաջ Հայկական կարմիր խաչը, համագործակցելով ԱԻՆ Ճգնաժամային կառավարման պետական ակադեմիայի հետ, սկսել է լայնածավալ ծրագիր: Մեր հիմնական թիրախը դպրոցներն են: Տպագրվում են նյութեր, ձեռնարկներ և բուկլետներ, կազմակերպվում են հանդեսներ, միջոցառումներ և մրցույթներ, որոնց մեջ երեխաները ներգրավում են նաև իրենց ընտանիքի անդամներին:

Աշխատանքային հանդիպումը շարունակվում է։ Արդյունքները կներկայացնենք քննարկումների ամփոփումից հետո։