Կանայք և աղջիկները` աղետների դիմակայման տեսանելի և անտեսանելի ուժ

Վաղը` հոկտեմբերի 13-ին, ժամը 10.30-ին հրավիրում ենք ձեզ մասնակցելու և լուսաբանելու «Կանայք և աղջիկները` աղետներին դիմակայելու տեսանելի և անտեսանելի ուժ» խորագրով միջոցառում-վարժանքին: Այն տեղի կունենա ՀՀ ԱԻՆ Ճգնաժամային կառավարման պետական ակադեմիայում (հասցե` Ավան, Աճառյան 1):

Միջոցառման կազմակերպիչներն են` ՀՀ ԱԻՆ Ճգնաժամային կառավարման պետական ակադեմիան (ՃԿՊԱ), ՄԱԿ-ի մանկական հիմնադրամը, «Սեյվ դը չիլդրեն» և «Վորլդ Վիժն» կազմակերպություններն ու Աղետների ռիսկի նվազեցման (ԱՌՆ) ազգային պլատֆորմը։

Վարժանքը նվիրված է Աղետների ռիսկի նվազեցման (ԱՌՆ) միջազգային օրվան և նպատակ ունի բարձրացնել ԱՌՆ գործընթացում հասարակության իրազեկվածությունը գենդերային հարցերի վերաբերյալ, խրախուսել կանանց և աղջիկների մասնակցությունը, ինչպես նաև զարգացնել աղետին դիմակայելու կարողությունները: Կներկայացվեն նաև հաշմանդամություն ունեցող երեխաների ԱՌՆ գործում մասնակցությանը խոչընդոտող խնդիրները:

Աղետների նվազեցման հարցում կանանց դերը շատ հաճախ մնում է անտեսանելի կամ չի կարևորվում, չնայած այն փաստին, որ աշխարհի շատ վայրերում կանայք պաշտպանել և վերակառուցել են իրենց համայնքներն ինչպես աղետից առաջ, այնպես էլ դրանից հետո: ԱՌՆ միջազգային օրն այս տարի շեշտադրում է աղետներին նախապատրաստվելու և դրանց ռիսկը նվազեցնելու գործում կանանց կարևորագույն դերը:

Միջոցառման ընթացքում ՃԿՊԱ դասախոսների և ուսանողների կողմից կներկայացվեն փրկարարական վարժանքներ, ավտոտրանսպորտային միջոցի վթարի մոդելավորում, ինչպես նաև փրկարարական ու հակահրդեհային անվտանգության սարքավորումներ:

Միջոցառմանը կմասնակցեն պատասխանատու նախարարությունների, միջազգային և տեղական կազմակերպությունների ներկայացուցիչներ, ՃԿՊԱ և մանկավարժական համալսարանների ուսանողներ: