Ստորագրվել է ՀՀ մշակույթի նախարարության և ՌԴ մշակույթի նախարարության միջև 2012-2015 թթ. համագործակցության ծրագիր

Գիտություն և Մշակույթ 13 Հոկտեմբեր, 2012 4:22

Ս. թ. հոկտեմբերի 12-ին, ՀՀ մշակույթի նախարարությունում ստորագրվել է «Հայաստանի Հանրապետության մշակույթի նախարարության և Ռուսաստանի Դաշնության մշակույթի նախարարության միջև 2012-2015 թթ. համագործակցության» ծրագիրը, որի նպատակն է կանոնակարգելու 2012-2015 թթ. հայ-ռուսական մշակութային համագործակցությունը: Փաստաթուղթը ստորագրել են Հայաստանի Հանրապետության մշակույթի նախարար Հասմիկ Պողոսյանը և Ռուսաստանի Դաշնության մշակույթի նախարարի տեղակալ Անդրեյ Բուսիգինը:

«Հայաստանի Հանրապետության մշակույթի նախարարության և Ռուսաստանի Դաշնության մշակույթի նախարարության միջև 2012-2015 թթ. համագործակցության» ծրագիրը բաղկացած է 18 հոդվածից, որը կանոնակարգելու է հայ-ռուսական մշակութային համագործակցությունը մշակույթի և արվեստի /կինո, թանգարան, գրադարան/ ոլորտներում: Ծրագրի համաձայն, կողմերը կաջակցեն.

*ստեղծագործական կոլեկտիվների և անհատ կատարողների փոխանակումներին, մասնակցությանը երկու երկրներում անցկացվող միջազգային փառատոներին և մրցույթներին,

*բարենպաստ պայմաններ կստեղծեն կերպարվեստի, բեմարվեստի, կինեմատոգրաֆիայի, գրադարանային և թանգարանային գործի, դեկորատիվ-կիրառական, ինքնագործ և կրկեսային արվեստի, պատմամշակութային ժառանգության օբյեկտների, ժողովրդական արհեստների պահպանման բնագավառում համագործակցության զարգացման համար,

*կողմերը կաջակցեն համատեղ նախագծերի իրականացմանը' կինոյի, թատրոնի, գրականության ոլորտներում, ակտիվորեն կմասնակցեն երկու երկրների համար նշանակալից համարվող իրադարձություններին և միջոցառումներին,

*փոխադարձության հիման վրա կկազմակերպվի մշակույթի, կինոյի օրեր, կիրականացվեն ցուցահանդեսների փոխանակումներ,

*կողմերը կշարունակեն աջակցել կադրերի պատրաստման և վերապատրաստման գործընթացին: Ռուսական կողմը մշտապես համապատասխան քվոտաներ կտրամադրի ՌԴ ստեղծագործական բուհերում Հայաստանի քաղաքացիների ուսուցման և վերապատրաստման համար: