«Շոուների սիրահար» Արզաքանցյանը ստել է լրագրողին (տեսանյութ)

ԱԺ նախկին պատգամավոր, գործարար Տիգրան Արզաքանցյանը news.am-ի թղթակցի հետ հարցազրույցում անդրադարձել է իր թիկնապահներին բերման ենթարկելու մասին տեղեկություններին: «Իմ թիկնապահները ոստիկանության աշխատակիցներ են: Ստացվում է, որ իրենք զինաթափել են իրենց աշխատակիցներին: Սա շոու է, բայց, թե ո՞ւմ համար են այս շոուն իրականացնում, ես չգիտեմ»,- հայտարարել է Արզաքանցյանը եւ ընդգծել, որ իրեն 4 թիկնապահներ են ուղեկցել:

Ի պատասխան հնչած մեղադրանքների, Ոստիկանությունը պարզաբանումներ է տվել, որոնք տառացիորեն պառում է օլիգարխի դիմակը։

«Նախ ասեմ, որ ոստիկանությունը չի զինաթափել Արզաքանցյանի թիկնազորին, այլ զգուշացրել եւ կարգի է հրավիրել: Համապատասխան տեսագրության մեջ էլ հստակ երեւում է, թե ինչպես են հանդիպակաց գոտով երթեւեկում թիկնապահները՝ հետեւելով Արզաքանցյանի մեքենային: Կասեցնելով նման գործողությունը ոստիկանությունը նախեւառաջ ապահովել է պրն Արզաքանցյանի անվտանգությունը, որովհետեւ հանդիպակած գոտի դուրս գալը չափից դուրս վտանգավոր է»,-մեր թղթակցի հետ զրույցում հայտարարեց ՀՀ Ոստիկանության հասարակայնության հետ կապերի եւ լրատվության վարչության պետ Աշոտ Ահարոնյանը:

Ահարոնյանը հայտնեց նաեւ, որ Արզաքանցյանի թիկնազորի մեջ իրոք կան Ոստիկանության Պետական պահպանության գլխավոր վարչության աշխատակիցներ՝ պայմանագրային հիմունքներով: «Այլ հարց է, որ պրն Արզաքանցյանի ոչ միայն անձը այլ նաեւ գույքը պայմանագրային հիմունքներով Պետական պահպանության գլխավոր վարչության աշխատակիցներն են պահպանում, իհարկե պայմանագիրը կարծեմ գործում է միակողմանի, որովհետեւ ամիսներ շարունակ չի վճարվում»:

Հարցին, թե իրոք տեղին է Արզաքանցյանի դիտարկումը, որ այդ ամենը շոու է եղել եւ որ ոստիկանությունը զինաթափում է իր իսկ աշխատակիցներին, Ահարոնյանը արձագանքեց. «4-5 թիկնապահ բացում են մեքենայի դուռը, որպեսզի պրն Արզաքանցյանը նստի, եթե դա անվտանգության առումով է արվում...շոուն հենց դա է»:

Ահարոնյանը նաեւ ուշադրություն հրավիրեց այն հանգամանքի վրա, որ Արզաքանցյանի մեքենայի վրա ԱԺ պետհամարանիշ է, երբ նա վաղուց արդեն պատգամավոր չէ:

Կից ներկայացնում ենք Ոստիկանության տեսանյութը.

Yerkir.am