Սիրիայի ազատ բանակը հայտարարել է, որ ոչնչացրել է 60-ից ավել ինքնաթիռ

Սիրիայի ազատ բանակի ընդդիմադիր խմբավորման հրամանատարությունն ուրբաթ օրը հայտարարել է, որ երկրի  հարավում գտնվող Դարաա նահանգի Մարաբա գյուղի մոտակայքում ոչնչացրել է սիրիական ռազմաօդային ուժերի ուղղաթիռը: Այս մասին հայտնում է «Ալ Բաշիր» ինտերնետ կայքը:

Սիրիայի ազատ բանակի հրամանատարությունը պնդում է, թե Բաշար Ասադի ռեժիմին դիմակայելու ողջ ապստամբական շարժման ընթացքում՝ սկսած անցյալ տարվա մարտից, ոչնչացրել են սիրիական բանակի 60-ից ավել ինքնաթիռ և ուղղաթիռ:

Սիրիայի ազատ բանակի հրամանատարության տվյալներով՝ այդ ռազմական տեխնիկայի մեծ մասը (38 ուղղաթիռ, 24 ինքնաթիռ,) ոչնչացվել է ապստամբների կողմից վերջին 7 ամիսների ընթացքում, օդանավակայանների վրա կատարած հարձակումների արդյունքում: Սիրիայի ազատ բանակը պնդում է, թե այս տարվա օգոստոսին միայն Իդլիբի շրջանում Աբու ազ Զահուր օդանավակայանի վրա կատարած հարձակման ժամանակ ոչնչացրել են 10 ռազմական ինքնաթիռ:

Սիրիական իշխանությունները հայտարարում են, որ պայքարում են շատ լավ զինված գրոհայինների դեմ, որոնք դրսից աջակցություն են ստանում: