ԱՄՆ-ն Սիրիայի հանդեպ Ռուսաստանի քաղաքականությունը որակել է «բարոյապես չկայացած»

ԱՄՆ-ի Պետդեպարտամենտը քննադատում է Մոսկվային Դամասկոսին ռազմամթերք մատակարարելու համար:

Սիրիայի նախագահ Բաշար Ասադի ռեժիմի աջակցությանն ուղղված Ռուսաստանի քաղաքականությունը «բարոյապես չկայացած» է. հայտարարել է ԱՄՆ-ի պետդեպարտամենտի ներկայացուցիչը՝ մեկնաբանելով Անկարայում սիրիական ինքնաթիռի հարկադիր վայրէջքի հետ կապված միջադեպը. այս մասին տեղեկացնում է BBC-ն: 

Ուրբաթ օրը Ռուսաստանը հայտնել էր, որ ինքնաթիռը տեղափոխում էր հակաօդային պաշտպանության համար նախատեսված ռուսական էլեկտրոնային տեխնիկա:

ՌԴ ԱԳ նախարար Սերգեյ Լավրովի խոսքերով՝ օդանավում առկա են եղել երկակի նշանակության էլեկտրատեխնիկական սարքավորումներ, որոնց փոխադրումը սակայն չի արգելվում միջազգային կոնվենցիաներով:

Պետդեպարտամենտի պաշտոնական ներկայացուցիչ Վիկտորիա Նուլանդը հայտարարել է, որ Ռուսաստանի գործողությունները չեն խախտել որևէ միջազգային կոնվենցիա, քանի որ Մոսկվան և Պեկինը նախկինում արգելել էին Սիրիայի դեմ ՄԱԿ-ի ԱԽ-ի ընդունած պատժամիջոցները:«Սակայն նման քաղաքականությունը, միևնույնն է, բարոյապես կայացած չէ»,-հայտարարել է նա:

Նրա խոսքերով՝ ԱԽ-ի բոլոր մյուս անդամ պետությունները՝ Ռուսաստանից և Չինաստանից բացի, անում են ամեն բան, որ խոչընդոտեն Ասադի ռեժիմի՝ արտաքին ուժերի կողմից աջակցությունը:

Նուլանդը հավելել է, որ Թուրքիան ԱՄՆ-ին արդեն տրամադրել է բավականին մանրամասն տեղեկություն այն մասին, թե ինչ է եղել օդանավի մեջ, սակայն չի մանրամասնել ռուսական բեռի պարունակությունը: «Սակայն մենք կասկած չունենք, որ դրանք լուրջ ռազմական սարքավորումներ են եղել»,-ասել է նա: