Կահիրեում բախումների արդյունքում տուժել է 120 մարդ

Կահիրեի կենտրոնում այս ուրբաթ բռնկված անկարգությունների արդյունքում տուժել է 120-ից ավել մարդ: Այդ մասին հաղորդում է ИТАР-ТАСС-ը՝ հղում կատարելով Եգիպտոսի առողջապահության նախարարությանը:

Շտապ օգնության բժիշկները հայտնում են, որ հիվանդանոցներում կան հրազենային վնասվածք ստացած տասնյակ վիրավորներ:

Թահրիրի հրապարակում բախումները սկսվել են ուրբաթօրյա աղոթքից հետո, երբ հրապարակում հավաքվել են Եգիպտոսի նախագահ Մուհամմեդ Մուրսիի կողմնակիցներն ու հակառակորդները: Մայրաքաղաքի սրտում կատարվող իրադարձությունները հիշեցնում էին 2011-ի հունվար-փետրվար ամիսների իրադարձությունները, երբ եգիպտացիները ձգտում էին հասնել Հոսնի Մուբարաքի հրաժարականին:

Առաջին անգամ հունսիսին կայացած նախագահական ընտրություններից հետո ցուցարարները բողոքում են գործող նախագահի դեմ: Մուրսիի ընդդիմադիրները դժգոհում են նրա աշխատանքից, կարծելով, որ Մուրսին տապալել է իր կառավարման առաջին 100 օրը՝ երկրում ոչինչ չփոխելով դեպի լավը, ինչպես նախկինում էր խոստացել:

Նախօրեին «Մուսուլման եղբայրները» իրենց կողմնակիցներին դուրս էին հանել փողոց՝ կրկնակի դատարան պահանջելով տապալված ռեժիմի արդարացված գործիչների համար:

Իրենց հերթին Մուրսիի ընդդիմադիրները մտադիր չեն հրաժարվել իրենց պահանջներից՝ պահանջելով ցրել Ազգային խորհուրդը, որը նոր Սահմանադրություն է մշակում երկրի համար: Խորհրդի աշխատանքներին հրաժարվել են մասնակցել մի քանի աշխարհիկ կուսակցություններ և լիբերալ ուժեր: Նրանք կարծում են, որ ապագա Հիմնական օրենքը չի արտահայտում եգիպտացի ժողովրդի բոլոր խավերի շահերը:

Թահրիրում կրկին վրանային ճամբար է խփվել:

Ուրբաթ օրը զանգվածային բողոքի ցույց է եղել նաև Ալեքսանդրիայում: Այդ ժամանակ այնտեղ գտնվելիս է եղել նաև նախագահ Մուրսին: