Աղետների ռիսկի նվազեցման միջազգային օրը՝ Հայաստանում

Հոկտեմբերի 13-ին` աղետների ռիսկի նվազեցման (ԱՌՆ) միջազգային օրը, ՀՀ ԱԻՆ Ճգնաժամային կառավարման պետական ակադեմիայում (ՃԿՊԱ) տեղի ունեցավ միջոցառում-վարժանք՝ «Կանայք և աղջիկները` աղետներին դիմակայելու տեսանելի և անտեսանելի ուժ» խորագրով:

Վարժանքի նպատակներն էին՝

· բարձրացնել ԱՌՆ գործընթացում հասարակության իրազեկվածությունը գենդերային հարցերի վերաբերյալ.

· խրախուսել կանանց և աղջիկների մասնակցությունը. զարգացնել աղետին դիմակայելու կարողությունները:

Միջոցառումն անցավ երկու փուլով: Սկզբում ցուցադրվեցին փրկարարների և ուսանողների հմտությունները՝ տուժածներին պարանների միջոցով շենքի պատուհանից իջեցնելու գործում: Սցենարի համաձայն՝ տուժածները չորսն էին՝ բոլորն էլ՝ աղջիկ: Նրանցից երկուսը սեփական ուժերով կարողացան ցած իջնել պարանով, իսկ մյուս երկու «տուժածներին» իջեցրեցին փրկարաները, քանի որ նրանք գլխի «վնասվածքներ» ունեին: Հաջորդը ավտոտրանսպորտային միջոցի վթարի մոդելավորում էր, որի վարորդը, նույնպես աղջիկ, գլխի և ողնաշարի պայմանական վնասվածքներ էր ստացել: Կարճ ժամանակում ակադեմիայի ուսանող-փրկարարները նրան դուրս բերեցին մեքենայի միջից և հանձնեցին դեպքի վայր ժամանած շտապօգնության բրիգադին:

ԱՌՆ միջազգային օրն այս տարի շեշտադրում է աղետներին նախապատրաստվելու և դրանց ռիսկը նվազեցնելու գործում կանանց կարևորագույն դերը: Այդ կապակցությամբ ՃԿՊԱ ռեկտոր, գնդապետ Համլետ Մաթևոսյանը լրագրողների հետ զրույցում նշեց.«Այս ոլորտում նույնպես պետք է լինի գենդերային հավասարություն: Այսօր կանայք և աղջիկները կարող են տղամարդկանց հետ հավասարապես մասնակցել փրկարարական աշխատանքներին, ինչպես նաև դրանց ղեկավարմանը»:

Միանալով ռեկտորի խոսքին՝ «ԱՌՆԱՊ» հիմնադրամի տնօրեն Մովսես Պողոսյանը հավելեց.«Մեր հիմնադրամի աշխատակիցների 82 տոկոսը կանայք և աղջիկներ են: Դա շատ ողջունելի է, քանի որ նրանք շատ սրտացավ, դիմացկուն, ուժեղ և հետևողական են իրենց գործում: 2004 թ. նրանք եղել են առաջին օգնության Եվրոպայի չեմպիոններ՝ ցույց տալով հիանալի արդյունքներ: Մինչև հիմա էլ կամավորների մեծ մասն աղջիկներ են: Սա խոսում է այն մասին, որ մենք կարող ենք և պատրաստ ենք Հայաստանը աղետակայուն երկիր դարձնել»: