Էլեկտրոնային գրքերն ավելի թանկ են, քան դրանց տպագիր տարբերակները

Երբ Amazon.com–ը 2007թ.–ին սկսեց թողարկել էլեկտրոնային գրքերի ընթերցանության համար նախատեսված Kindle սարքը, ամենաշատ վաճառվող գրքերի էլեկտրոնային տարբերակներն արժեին 9,99 դոլար, իսկ սարքը՝ 399–ը։ Հիմա Kindle–ն արժե 100 դոլարից պակաս, իսկ գրքերի գինը կտրուկ աճել է։ Որոշ դեպքերում էլեկտրոնային գրքերն ավելի թանկ են, քան դրանց տպագիր տարբերակները։ Այս մասին գրում է Ведомости–ն՝ հղում անելով The Wall Street Journal–ին:

Էլեկտրոնային գրքերի թանկացման պատճառն ԱՄՆ–ի վեց հրատարակչությունների պայմանավորվածությունն է՝ վերջնական սպառողի համար գին սահմանել և սահմանափակել մանրածախ առևտրականների իրավունքը գրքերը վաճառել այդ գնից ցածր գնով։

Պայմանավորվածության նախաձեռնողը Apple–ն է, որն այդպես էլ չցանակացավ համակերպվել Amazon–ի զեղչային քաղաքականության հետ։ Apple–ին հաջողվեց համոզել հինգ հրատարակիչների հրաժարվել վաճառքների մանրածախ մոդելից, երբ մանրածախ առևտրականները մեծածախ գնով ձեռք էին բերում էլեկտրոնային գրքերի լիցենզիաները իսկ հետո ազատ էին ցանկացած գին սահմանելիս։ Իսկ 2011թ. մարտին այս հրատարակչություններին միացավ նաև այդ շուկայի խոշորագույն խաղացողը՝ Random House–ը։

ԱՄՆ–ի արդարադատության դեպարտամենտը սկսել է հետաքննել որոշման օրինականությունը։

Թղթային գրականության շուկայում նման պայմանավորվածություններ չկան, և մանրածախ առևտրականները կարող են ինքնուրույն սահմանել գները։

Ոլորտի փորձագետների կարծիքով, նման որոշումը կարող է նվազեցնել էլեկտրոնային գրականության վաճառքները, որոնք կտրուկ աճում էին վերջին երեք տարիների ընթացքում։ Հիմա հրատարակիչների հասույթի 15-20%–ը բաժին է ընկնում գրքերի էլեկտրոնային տարբերակների վաճառքին։

«Ինչո՞ւ վճարել 10 կամ 15 դոլար էլեկտրոնային գրքի համար, եթե նույն Amazon–ում կարելի է գտնել երկրորդ ձեռքի տպագիր գիրքը 2 կամ 3 դոլարով»,– WSJ-ին ասել է Նյու Յորքի մի քաղաքացի։