«Ես քեզ, դու` ուրիշին». Ինչպես օգնել քաղցկեղով հիվանդներին

«Ես քեզ, դու` ուրիշին» բարեգործական նախաձեռնության մեկնարկը տրված է:

Հոկտեմբերի 13-ին ժամը 18:00-ին ՆՓԱԿ-ում «Ես քեզ, դու` ուրիշին » բարեգործական նախագիծը ներկայացրել է «Pay it forward » գեղարվեստական ֆիլմը: Այս ֆիլմի ընտրությունը պայմանավորված է նրա գլխավոր գաղափարախոսությամբ, որն էլ ներշնչանքի աղբյուր է հանդիսացել նախագծի կազմակերպիչների համար: Ֆիլմի դիտում-քննարկումը բարեգործական նախաձեռնության մեկնարկային, պրեզենտացիոն միջոցառումների մաս էր կազմում և նպատակ ուներ ներկայացնել նախաձեռնության գաղափարական հիմքերն ու ընդհանուր էությունը: 

Հիշեցնենք, որ «Ես քեզ, դու` ուրիշին» բարեգործական նախաձեռնությունը միասնական հարթակի ձևավորում է՝ քաղցկեղով հիվանդ անձանց օգնելու համար: Այս մասին լրագրողների հետ հանդիպմանը ասաց նախաձեռնության համահիմնադիր, իրավաբան Արմեն (Արմոս) Մարտիրոսյանը, հայտնում է armtown.com կայքը:

Ներկայացնելով «Ես քեզ, դու` ուրիշին » բարեգործական նախագծի նախապատրաստական փուլի մանրամասները, հեռանկարներն ու խնդիրները՝ նա նշեց, որ կան բազմաթիվ անհատներ, ովքեր ցանկանում են նման նախաձեռնություններով հանդես գալ և օգնել հիվանդներին: «Ստեղծում ենք մեկ միասնական հարթակ, որպեսզի կազմակերպված կերպով օգնություն ցուցաբերենք քաղցկեղով հիվանդներին»,- ասաց նա՝ տեղեկացնելով, որ իրենք պատրաստելու են նյութեր հիվանդների մասին, ներկայացնելու են հանրությանը, որպեսզի նրանք իրենց հերթին իրենց լուման ներդնեն հիվանդներին օգնելու համար: Անձը, ով ունի հիվանդություն, կարող է դիմել կազմակերպիչներին, նրանք նյութ կպատրաստեն տվյալ հիվանդի մասին և այն տեղադրելով իրենց ցանցում՝ կծանոթացնեն տվյալ հիվանդին հանրության հետ: Այնուհետ հասարակության լայն զանգվածները կարող են նշված հաշվեհամարներին գումար փոխանցել՝ սկսած հարյուր դրամից: Արմենը նշեց, որ իրենց հարթակը կապող օղակ է լինելու հանրությանն ու հիվանդներին. «Առաջնահերթ օգնություն կտրվի այն անձանց, ովքեր շատ ծանր վիճակում են, ինչպես նաև՝ երեխաներին»:

 Ֆինանսական միջոցներ դեռ չկան, սակայն կազմակերպիչները հույս հայտնեցին, որ բարեգործական կազմակերպություններն իրենց աջակցությունը կտան: