Ադրբեջանական կայքը հայկական օդուժի մասին

Տիեզերքից արված լուսանկարների վերլուծությունը վկայում է այն տեղափոխությունների մասին, որոնք կարող են լուրջ կերպով ազդեցություն ունենալ Կովկասում հակաօդային պաշտպանության ուժերի հարաբերակցության վրա, տեղեկացնում է REGNUM լրատվական գործակալությունը' հղում անելով ադրբեջանական Contact.az-ին:

Վերջինս վկայակոչում է ԱՄՆ-ում կենտրոնացած ռազմական կենտրոնի' IMINT-ի վերլուծությանը, որը հրապարակել է տարածաշրջանում հայկական և ռուսական ՀՕՊ համակարգերի' արբանյակից արված լուսանկարներ: Այդ կենտրոնի փորձագետ Շոն Օ’Քոնորի խոսքերով «պատկերները վկայում են Հայաստանում և վրացական Աբխազիա շրջանում նոր C-300 համակարգերի հայտնվելու մասին.
«Տեղաբաշխման երկու վայրերն էլ նշանակալից ներուժ ունեն հետագա ընդարձակման համար»:

Ադրբեջանական կայքը գրում է, որ մինչև 2008թ. Հայաստանը ներմուծել է առնվազն C-300-ի 3 մարտկոցների բաղադրամասեր' փոխարինելով հնացած C-125-երը Երևանի պաշտպանության համար: 2010թ. Ռուսաստանը լրացուցիչ զույգ C-300 է տեղակայել Սյունիքի մարզում' Գորիսի և Կաղնուտ գյուղի մոտակայքում. զույգ մարտկոցներն էլ գտնվում են Լեռնային Ղարաբաղի սահմանից 7 կմ հեռավորության վրա:

«2011թ. լուսանկարների համաձայն' Գորիսի շրջանում ներկայիս դրությամբ տեղակայված են մի քանի մարտկոցներ: Այնտեղ C-300-ի ծավալման դեպքում Հայաստանի ՀՕՊ-ի պաշտպանության տակ է հայտնվում Լեռնային Ղարաբաղի ողջ շրջանը», - նշել է Օ'Քոնորը:
«Հայկական C-300-ի տեղակայումը Լեռնային Ղարաբաղին հարող տարածքում խոսում է տարածաշրջանում հնարավոր հակամարտության տարբեր սցենարներին նախապատրաստվելու մասին», - եզրափակում է Օ'Քոնորը: