Մեկնարկեց Տաթևի համայնքային զարգացման ծրագիրը (տեսանյութ, լուսանկարներ)

Երեկ՝ հոկտեմբերի 14-ին, ՄԱԿ-ի զարգացման ծրագրի և Հայաստանի ազգային մրցունակության հիմնադրամի հետ համատեղ  մեկնարկեց Տաթևի համայնքային զարգացման ծրագիրը։

Ինչպես իր խոսքում նշեց Հայաստանի ազգային մրցունակության հիմնադրամի գլխավոր գործադիր տնօրեն Արման Խաչատուրյանը, ծրագրի նպատակն է պատմամշակութային ժառանգության վերականգնումն ու պահպանումը, զբոսաշրջային նոր արժեքների բացահայտումն ու դրանց նպատակային կիրառման հիմքի վրա համաչափ զարգացումը։

Ծրագիրն ուղղված է ապահովելու 9-րդ դարի Տաթևի վանական համալիրի և հարակից տարածքների վերականգնումը։ Այս ծրագիրը ներառում է նաև վանքի շուրջ գտնվուղ ութ գյուղական համայնքները»,- լրագրողների հետ զրույցի ընթացքում ասաց Արման Խաչատուրյանը։

Ծրագրի հանդիսավոր մեկնարկին ներկա էր նաև «Տաթևի վանքի» վանահայր Տեր Միքայել Աբեղա Գևորգյանը, ով օրհնեց և հաջողություն մաղթեց այս գործընթացին։

Տաթևի համայնքային զարգացման ծրագրի շրջանակներում նախատեսված է կառուցել գյուղատնտեսական մթերքների մանրածախ շուկա, որը թույլ կտա համայնքի բնակիչներին իրենց արտադրանքը վաճառել զբոսաշրջիկներին առանց միջնորդի։ Ներկայումս Տաթև ժամանած զբոսաշրջիկները գիշերակացներ չլինելու պատճառով շտապում են ետ վերադառնալ, այդ իսկ պատճառով նախատեսված է համայնքի բնակիչներին հնարավորություն ընձեռել՝ բարելավելու իրենց բնակարանային պայմանները, հարմարեցնել զբոսաշրջային տան պայմաններին և դրանք տրամադրել զբոսաշրջիկներին. այդ կերպ կխթանեն զբոսաշրջության զարգացումը, կամբողջականացվի նաև համայնքի կոյուղացումը, կլուծվեն աղբահանության և ջրամատակարարման առկա խնդիրները։

Ծրագրի մեկնարկի արարողությանը ներկա էր նաև ՄԱԿ-ի զարգացման ծրագրի հայաստանյան գրասենյակի ներկայացուցիչ Հռիփսիմե Մանուկյանը, ով, կարևորելով ծրագրի իրականացումը, համարեց այն համայնքների համապարփակ զարգացումը խթանող միջոց։

«Բացահայտում ենք համայնքի կարիքները, որոշում դրանց առաջնահերթությունը և ընտրում ռազմավարություն։ Բացահայտված խնդիրները դասակարգում ենք ըստ ենթակառուցվածքների, եկամուտ ստեղծող ծրագրերի, բայց միայն նրանք, որոնք ուղղված են զբոսաշրջության զարգացմանը»,-նշեց վերջինս։

Գյուղացիներից մեկը Լուրեր.com-ի թղթակցի հետ զրույցում նշեց, որ այս ծրագրի իրագործումը կարող է առիթ հանդիսանալ, որ գյուղում մնացած երիտասարդներն աշխատանք ունենան և չլքեն առանց այն էլ «մեռնող» գյուղը։

Պատրաստեցին` Նելլի Ավետիսյանը և Ազատուհի Արասխանյանը

{gallery}tatev{/gallery}