Iarex.ru. Հայաստանը չեզոքացնում է Օսկանյանին, սակայն կարող է ստանալ Քոչարյանին

2012թ. հոկտեմբերի 2-ին Հայաստանի խորհրդարանը զրկեց պատգամավորական անձեռնմխելիությունից «Բարգավաճ Հայաստան» կուսակցության անդամ, ՀՀ նախկին ԱԳ նախարար Վարդան Օսկանյանին: Դա հնարավորություն տվեց Օսկանյանի դեմ գործ հարուցել հատուկ մեծ մասշտաբով փողերի յուրացման և լվացման մեղադրանքով. գրում է iarex.ru գործակալությունը:

Վարդան Օսկանյանը ղեկավարում է «Սիվիլիթաս» հիմնադրամը, որը գոյատևում է նաև բարեգործական միջոցներով: Դատախազությունը մեղադրանք է ներկայացրել Օսկանյանին՝ անձնական նպատակների համար հիմնադրամի միջոցները (181 մլն. դոլարի չափով) ծախսելու համար: Ընդ որում, հիմնադրամը հովանավորող բարեգործը որևէ հավակնություն չի ներկայացնում Օսկանյանի նկատմամբ միջոցների վատնման հարցում, մինչդեռ դատախազությունը պնդում է, որ իր պարտքն է «պաշտպանել Սիվիլիթասի շահերը»,-հաղորդում է գործակալությունը:

«Բարգավաճ Հայաստան»-ը և հենց ինքը՝ Օսկանյանը, դատախազության գործողություններում քաղաքական ենթատեքստ են տեսնում և այն օրինական չեն համարում, ինչի հետ, սակայն, համաձայն չեն նրա գործընկերները «Հայաստանի Հանրապետական» և «Օրինաց Երկիր» կուսակցություններից:

Նախագահական ընտրությունները Հայաստանում կայանալու են 2013թ. փետրվարին: Որոշ քաղաքական գործիչներ, այդ թվում՝ Վարդան Օսկանյանը, պատրաստակամությունն են հայտնել իրենց ուսերին վերցնել երկրի բարձրագույն պաշտոնը ստանձնելու «բեռը»:

Ի պաշտպանություն Օսկանյանի՝ հանդես է եկել Հայաստանի նախկին նախագահ Ռոբերտ Քոչարյանը: Բացառված չէ, որ հենց Քոչարյանի թեկնածության առաջքաշումը նախագահական ընտրությունների ժամանակ կդառնա Օսկանյանի և «Բարգավաճ Հայաստանի» դեմ իրականացված գործողությունների պատասխան քայլը. եզրափակում է iarex. ru գործակալությունը։