Պետք է Վարդուհու մասին վերհիշեցնենք ժամանակ առ ժամանակ. 6 տարի առանց Վարդուհի Վարդանյանի (տեսանյութ)

Այսօր լրանում է երգչուհի Վարդուհի Վարդանյանի մահվան 6-րդ տարելիցը։

Ու թեև արդեն 6 աշուն է անցել նրա մահվան չարաբաստիկ օրվանից (2006 թվականի հոկտմբերի 16), նրա ընկերները՝ հանրությանը հայտնի երգիչ-երգչուհիներn ամեն կերպ փորձում են վառ պահել նրա հիշատակը, ամեն ինչ անում են նրա ներկայությունը հնարավորինս զգալի դարձնելու համար։

Նկարահանվում են տեսահոլովակներ, թողարկվում են ձայնասկավառակներ, կազմակերպվում են համերգներ, գործիքավորվում են երգեր, որոնք ստիպում են Վարդուհուն սիրող մարդկանց չզգալ իրենց սիրելի երգչուհու բացակայությունը։

Իմանալու համար, թե այս անգամ ինչ է պատրաստվել Վարդուհու հիշատակին նվիրված, lurer.com-ը  զրուցեց նրա ընկերներից երգչուհի Ալլա Լևոնյանի հետ։ Վերջինս նշեց, որ այս տարի Վարդուհուն սիրող մարդիկ և ընկերները, ովքեր սովորաբար պատրաստում էին նոր տեսահոլովակներ կամ երգեր, որոշել են լայնամասշտաբ ոչինչ չանել։

«Ոչ թե նրա համար, որ չենք ուզում անել, կամ ցանկություն չկա, այլ մենք որոշեցինք, որ ավեի մեծ մասշտաբով պետք է Վարդուհու մասին վերհիշեցնել ժամանակ առ ժամանակ, որպեսզի նա մնա իր բաձրության վրա և նրա անունը շատ չշահարկվի։ Իմ օրինակով փորձեմ մեկնաբանել. երբ անընդհատ քո մասին խոսվում է, դու արդեն դառնում ես անհետաքրքիր. պետք է միշտ պահել որոշակի սահման, թե երբ պետք է երևալ, երբ՝ «լռել»։ Իսկ մեր սիրելի Վարդուհու դեպքում մենք շատ ավելի զգույշ ենք, քանի որ մեծ պատասխանատվություն կա մեր ուսերին մեր ընկերուհու անունը ճիշտ տեղում և մակարդակում պահելու հարցում։

Առաջին 3-4 տարիներին ամեն ինչ դեռ թարմ էր, մեր էմոցիաները շատ էին, ու մենք փորձում էինք որքան հնարավոր է շատ հիշեցնել նրա մասին, որպեսզի այդ բացակայությունը փոքր-ինչ լցնենք։ Բայց, ինչպես գիտենք, ժամանակն ամեն ինչ մեղմացնում է, և մենք կփորձենք հիմնականում կլոր թվերի դեպքում ավելի մասսայական ձևով վերհիշեցնել Վարդուհու մասին»։

Հիշեցնենք նաև, որ վաղուց գործում է «Վարդուհի Վարդանյանի» անվան հիմնադրամ, որին փոխանցվում է երգչուհու հիշատակի համար կազմակերպված համերգից ստացված շահույթը կամ ձայնասկավառակների վաճառքից առաջացած գումարը։ Իսկ հիմնադրամի գումարով գործիքավորվում են Վարդուհի Վարդանյանի այն բոլոր աշխատանքները, որոնք նա պետք է աներ և կիսատ են մնացել։

«Գուցե կիսատ մնացած տեսահոլովակներ կամ երգեր, որոնք Վարդուհին չհասցրեց ավարտին հասցնել։ Խոսքը չի վերաբերվում մեր կողմից ստեղծված և նրա հիշատակին նվիրված երգերին։ Հիմնադրամը ծառայում է միայն նրա ստեղծագործությունների համար»,- նշեց Ալլա Լևոնյանը։