Հայկական ինքնաթիռի հարկադիր վայրէջքի մասին լուրը սադրանք է. Վահան Հովհաննիսյան

Լուրեր.com–ի հետ զրույցում անդրադառնալով այն լուրերին, որ թուրքերը ստիպել են հայկական ինքնաթիռին վայրէջք կատարել, ՀՅԴ խմբակցության պատգամավոր Վահան Հովհաննիսյանն ասաց, որ վայրէջքը հարկադիր չի եղել։

«Այդպիսի բան չկա։ Դա սադրանք է։ Հարկադիր վայրէջք չի եղել։ Նախնական պայմանավորվածության համաձայն ենք այնտեղ իջեցրել ինքնաթիռը։ Ինքնաթիռի նախնական թռիչքային ուղղությունը եղել է Երևան–Էրզրում–Հալեպ։ Այսպես է եղել թուրքական կողմի հետ համաձայնությունը»,– ասաց Հովհաննիսյանը և հավելեց, որ ստուգումները դեռ շարունակվում են։

Հիշեցնենք, որ քիչ առաջ Agence France Press-ը, հղում կատարելով տեղական ԶԼՄ-ներին, տեղեկություն էր տարածել, որ թուրքական իշխանությունները հոկտեմբերի 15-ին ստիպել են վայրէջք կատարել Արևելյան Թուրքիայի տարածքով թռչող հայկական քաղաքացիական ինքնաթիռը։

Անկարան բացատրել է իր գործողությունները հայկական օդանավի բեռը ստուգելու անհրաժեշտությամբ: Ինքնաթիռը վայրէջք է կատարել Էրզրումի օդանավակայանում:

Հիշեցնենք, որ Վահան Հովհաննիսյանը «Օգնի՛ր եղբորդ» նախաձեռնության համակարգողն է։ Իսկ ինքնաթիռը, որը վայրէջք է կատարել Էրզրումում, «Օգնի՛ր եղբորդ» նախաձեռնության շրջանակներում Հալեպ ուղարկված օգնությունը տեղափոխող ինքնաթիռն է։