Թուրքիան ամեն գնով ձգտում է «կանխել» Ֆրանսիային

Ինչպես հաղորդում է թուրքական «Hurriyet Daily News»-ը, նախօրեին Թուրքիայի արտգործնախարար Ահմեդ Դավութօղլուն հայտարարել է, որ «Եթե Ֆրանսիայի սենատը դեկտեմբերի 22–ին ընդունի Հայոց ցեղասպանությունը քրեականացնող օրինագիծը, դրան ի պատասխան Թուրքիայի խորհրդարանը կընդունի 1945թ–ին Ֆրանսիայի կողմից Ալժիրում իրականացրած ցեղասպանության մասին օրինագիծը, որին զոհ է գնացել 45 հազ. մարդ»։ 

Թուրք նախարարը հայտարարել է, որ Ֆրանսիայի կողմից օրինագծի ընդունումը մեծ հարված է խոսքի ազատությանը. «Առաջին հերթին այս օրինագծի դեմ պետք է դուրս գա Ֆրանսիայի հասարակությունը՝ բողոքելով խոսքի ազատության դեմ բռնություններին։ Ֆրանսիայում վտանգված է խոսքի ազատությունը, որը խախտում է ֆրանսիական ավանդույթները։  Քաղաքացիական հասարակությունը պետք է գործողություններ ձեռնարկի այս ուղղությամբ։ Այս առնչությամբ Ֆրանսիայի կառավարությունը Սենատի հետ միասին դուրս է եկել քաղաքացիական հասարակության դեմ։ Այդ օրինագծի ընդունումը Եվրոպային նորից կվերադարձնի միջնադար», – ասել է Դավութօղլուն։ 

Թուրքիայի խորհրդարանի արտաքին հարաբերությունների հանձնաժողովի նախագահ Վոլքան Բոզքիրումի գլխավորած պատվիրակությունը մեկնել է Փարիզ՝ հանդիպումներ ունենալու Ֆրանսիայի սենատի անդամների հետ՝ քննարկելու դեկտեմբերի 22–ին սենատում Հայոց ցեղասպանությունը ժխտելու դեմ քրեականացնող օրենքի ընդունման վերաբերյալ հարցեր։

Թուրքական պատվիրակությունը հանդիպելու է Ֆրանսիայի սենատի արտաքին հարաբերությունների հանձնաժողովի նախագահ Աքսել Պոնիատովսկու և Սոցիալիստական կուսակցության ներկայացուցիչ Պիեռ Մոսկովիչի հետ։ Թուրք-ֆրանսիական բարեկամական  խմբի անդամների և Ֆրանսիայի Միացյալ Ժողովրդական շարժման (UMP) ներկայացուցիչ Միշել Դեֆենբահերմի հետ հանդիպումներից հետո, դեկտեմբերի 20-ին Բոզքիրումի գլխավորած պատվիրակությունը հանդիպելու է նախագահ Նիկոլա Սարկոզիի դիվանագիտական հարցերով խորհրդական Ժան-Դեվիդ Լեվիտոնի և Ֆրանսիայի արտաքին գործերի նախարար Ալեն Լյուպեի հետ։ Ինչպես նաև հանդիպում է նախատեսված Ֆրանսիայի Սենատի նախագահ Բեռնար Ակույեի հետ։