Ամփոփում են համագործակցության արդյունքները

Այսօր ՀՀ ԱԻ նախարարություն էին այցելել Ճապոնիայի միջազգային համագործակցության գործակալության (JICA) աղետների կառավարման մասնագետ Ցուկիձո Մեգումին և «ՕՅՕ» միջազգային ընկերակցության սեյսմոլոգ-ինժեներ Ֆումիո Կանեկոն։

Այցի հիմնական նպատակը նախարարության և ճապոնական գործակալության իրականացրած ծրագրերի ամփոփումն էր և արդյունքների գնահատումը։

Ճապոնացի հյուրերին ընդունելով՝ ԱԻ նախարարի տեղակալ Հայկարամ Մխիթարյանը շնորհակալություն հայտնեց նրանց՝ օժանդակության և արդյունավետ համագործակցության համար։

«Մենք առ այսօր չենք մոռացել Ճապոնիայի կառավարության կողմից նվիրաբերած 28 հրշեջ մեքենաները»,- նշեց Հ. Մխիթարյանը,- «մեզ համար շատ կարևոր նշանակություն ունեցավ նաև Հայաստանի Հանրապետությունում սեյսմիկ ռիսկի գնահատման և կառավարման պլանավորման ծրագրի իրականացումը, որի ավարտին մենք լուրջ դրական արդյունքներ ունեցանք։ Մենք շատ բարձր ենք գնահատում Ճապոնիայի հետ սերտ համագործակցությունը, որն արդեն վերածվել է ջերմ բարեկամության, և մեր երախտագիտությունն ենք հայտնում բարձր մակարդակի վրա գտնվող արդյունավետ համագործակցության համար»։

Հանդիպման ընթացքում նախարարության ԱԻ քաղաքական ծրագրերի իրականացման վարչության պետ Գ. Պողոսյանը համառոտ ներկայացրեց Հայաստանում աղետների ռիսկի նվազեցման ուղղությամբ տարվող աշխատանքները, մշակվող ծրագրերն ու առաջնահերթությունները՝ նշելով, որ ներկայումս պատրաստվում է աղետների դեպքում բնակչության պաշտպանության միասնական հայեցակարգ, որը հաջորդ տարի կներկայացվի կառավարության ուշադրությանը։

Ֆումիո Կանեկոն նշեց, որ չնայած Հայաստանը համեմատաբար վերջերս է սկսել զարգացնել իր արտակարգ իրավիճակների կառավարման համակարգը' իրենց համագործակցությունը շատ դրական արդյունքներ է արձանագրել, որտեղ մեծ է ՀՀ ԱԻ նախարարության ներդրումը։

Նույն օրը ճապոնացի մասնագետներին ընդունեց նաև ՀՀ ԱԻՆ «ՍՊԱԾ» գործակալության պետ Հ. Պետրոսյանը։ Գործակալությունում հանգամանորեն ներկայացվեցին 2010-2012 թթ. ընթացքում «ՀՀ-ում սեյսմիկ ռիսկի գնահատման և կառավարման պլանավորման ծրագրի» շրջանակներում կատարված աշխատանքները։

Հանդիպումներից հետո ճապոնական գործակալության ներկայացուցիչները եղան նաև ՀՀ ԱԻՆ ճգնաժամային կառավարման կենտրոնում, որտեղ ծանոթացան դրա առաքելությանը, գործառույթներին, տեխնիկական հնարավորություններին և մասնավորապես, Երևանում սեյսմիկ ինտենսիվության բաշխման նոր համակարգի աշխատանքին։