Թուրքիան խնդրանքով դիմել է Ռուսաստանին. Bloomberg-ը մանրամասներ է հայտնել

Թուրքիան խնդրել է Ռուսաստանին հետաձգել Անկարայի բնական գազի վճարների մի մասը մինչև 2024 թվականը՝ փորձելով մեղմել էներգակիրների բարձր գների տնտեսական վնասը, հաղորդում է Bloomberg-ը՝ վկայակոչելով իրավիճակին ծանոթ մարդկանց։

«Էներգակիրներ ներմուծող թուրքական պետական Boru Hatlari ile Petrol Tasima AS-ը կամ Botas-ը ձգտում է հետաձգել վճարումների մի մասը մինչև 2024 թվականը»,- գրում է գործակալությունը՝ հղում անելով անանուն աղբյուրին։ Bloomberg-ի աղբյուրները նշում են, որ դեռ պարզ չէ՝ բանակցությունները կհանգեցնե՞ն ինչ-որ համաձայնության։

Էներգակիրների ներմուծումից Թուրքիայի մեծ կախվածությունը մեծացրել է ճնշումը նրա արժույթի և բյուջեի վրա, հայտնում է Bloomberg-ը: Գործակալությունը գրում է, որ տարեսկզբից թուրքական լիրան դոլարի նկատմամբ արժեզրկվել է ավելի քան 28%-ով, ինչը զարգացող շուկաների մեջ ամենամեծն է արգենտինական պեսոյից հետո։ Միևնույն ժամանակ, նշում է գործակալությունը, օգոստոսին Թուրքիայի առևտրային դեֆիցիտը ավելի քան կրկնապատկվել է նախորդ տարվա նույն ամսվա համեմատ և կազմել 11,2 մլրդ դոլար։