Ուսանողական միջազգային գիտաժողովը մեկնարկեց

Հոկտեմբերի 15-19-ը ուսանողական միջազգային գիտաժողովի 17 բաժանմունքների աշխատանքներն ընթանալու են ԵՊՀ 16 ֆակուլտետներում, հայտնում է Երևանի պետական համալսարանը:

Երեկ ԵՊՀ կենտրոնական մասնաշենքի մեծ դահլիճում տեղի ունեցավ միջազգային գիտաժողովի բացման հանդիսավոր արարողությունը, որին ներկա էին ԵՊՀ ռեկտոր Արամ Սիմոնյանը, Ուսանողների, շրջանավարտների եւ հասարակայնության հետ կապերի գծով պրոռեկտոր Ռուբեն Մարկոսյանը, ՈՒԳԸ նախագահ Միքայել Մալխասյանը, ՈՒԳԸ նախկին նախագահներ, ֆակուլտետների դեկաններ, պրոֆեսորադասախոսական կազմի ներկայացուցիչներ եւ ուսանողներ:

Գիտաժողովի աշխատանքների մեկնարկն ազդարարեց պրոռեկտոր Ռուբեն Մարկոսյանը, ով նախ շնորհավորեց մասնակիցներին, ապա խոսքը փոխանցեց ռեկտոր Արամ Սիմոնյանին:

«Այսօր նշանակալի իրադարձություն է, քանի որ այս գիտաժողովն ուսանողական է, ինչը, անշուշտ, ողջունելի է: Մեր գիտության վաղվա օրը հենց ուսանողներն են որոշելու, այն ուսանողները, ովքեր արդեն ուսանողական տարիներից ակտիվ են եւ մտադրված են գիտական կարիերա կառուցել: Ընդհանրապես գիտության հանդեպ սերը հենց այս տարիքից է ձեւավորվում, իսկ ՈՒԳԸ-ն իր գործի բերումով հենց այն կառույցն է, որը սերմանում է այդ սերն ուսանողների մեջ»,- նշեց Արամ Սիմոնյանը:

Շնորհավորական խոսքեր ասացին նաեւ ՈՒԳԸ նախագահ Միքայել Մալխասյանը, նախկին նախագահներ Աշոտ Ալեքսանյանը եւ Եզնիկ Միրզոյանը:

Հանդիսավոր արարողության վերջում Միքայել Մալխասյանն ՈՒԳԸ նախկին նախագահներ Ռուբեն Մարկոսյանին, Աշոտ Ալեքսանյանին եւ Եզնիկ Միրզոյանին պատվոգրեր շնորհեց:

Հավելենք, որ ուսանողների, ասպիրանտների եւ երիտասարդ գիտնականների միջազգային գիտաժողովը նվիրված է Հայ գրատպության 500-ամյակին եւ ԵՊՀ ուսանողական գիտական ընկերության հիմնադրման 65-ամյակին:

Գիտաժողովին մասնակցում են շուրջ 350 զեկուցողներ ՀՀ 15 եւ ԱՊՀ 16 բուհերից: Զեկուցողների հիմնական մասը կլինեն Մայր բուհից, կմասնակցեն նաեւ ԵՊՀ Իջեւանի մասնաճուղի ուսանողներն ու երիտասարդ հետազոտողները:

Միջոցառման կազմակերպիչն է ԵՊՀ ուսանողական գիտական ընկերությունը: Գիտաժողովի կազմակերպման աշխատանքներին աջակցել են նաեւ ԵՊՀ ռեկտորատն ու ֆակուլտետների դեկանները: