Կողմերը կարեւորեցին արդար եւ ազատ ընտրությունների անցկացումը՝ որպես Հայաստանի ապագան կանխորոշող կարեւոր նախապայման

Ազգային ժողովի արտաքին հարաբերությունների մշտական հանձնաժողովի նախագահ Արմեն Ռուստամյանը դեկտեմբերի 19-ին հանդիպեց Հայաստանում Մեծ Բրիտանիայի եւ Հյուսիսային Իռլանդիայի Միացյալ Թագավորության դեսպան Չարլզ Լոնսդեյլի հետ, ով ավարտում է դիվանագիտական առաքելությունը մեր երկրում:

Արմեն Ռուստամյանը դեսպանին շնորհակալություն հայտնեց համատեղ աշխատանքի, փոխանակված փորձի ու նաեւ կարծիքների համար՝ դրանք օգտակար համարելով մի շարք որոշումների կայացման գործում: Հանձնաժողովի նախագահը բարձր գնահատեց Հայաստանում ամեն ինչ բարելավելու՝ դեսպանի անձնական ձգտումներն ու այդ նպատակով ներդրած ներուժը:

Դեսպան Չարլզ Լոնսդեյլը հետաքրքրված է մեր երկրով եւ ցանկություն հայտնեց վերադառնալ Հայաստան եւ առաջիկա խորհրդարանական ընտրություններին ներկա լինել դիտորդի կարգավիճակով: Սպասվող ընտրություններից առաջ՝ զրուցակիցները երկուստեք կարեւորեցին արդար եւ ազատ ընտրությունների անցկացումը՝ որպես Հայաստանի ապագան կանխորոշող կարեւոր նախապայման: Արմեն Ռուստամյանը տեղեկացրեց, որ իր ներկայացրած ՀՅԴ կուսակցությունն ընտրությունները եւ դրանց նկատմամբ վերահսկողությունը կարեւորելով է նախաձեռնել «Ընտրական իրավունքի պաշտպանության» հասարակական շարժումը: Հանդիպման ընթացքում անդրադարձ եղավ նաեւ երկու երկրների միջեւ եկամուտների եւ կապիտալի կրկնակի հարկումը բացառելու մասին համաձայնագրի վավերացմանը: Արտաքին հարաբերությունների հանձնաժողովի նախագահը նշեց, որ այն արդեն օրակարգում է եւ առաջիկայում կհաստատավի խորհրդարանում: Մեծ Բրիտանիայում արդեն իսկ այն վավերացվել է թագուհու կողմից: Քննարկվեցին նաեւ այլ հարցեր եւս: