Կրկին բարձրացվել է Սաֆարովի հարցը

Մոլդովայի մայրաքաղաք Քիշնևում հոկտեմբերի 13-ին տեղի է ունեցել Եվրոպայի ժողովրդական կուսակցության խմբակցության հերթական նիստը:

Ինչպես հաղորդում է «Արմենպրես»-ը, նիստի աշխատանքներին մասնակցում էին Եվրանեսթի ԽՎ հայկական պատվիրակության անդամներ ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը, ԱԺ պատգամավորներ Կարինե Աճեմյանն ու Զարուհի Փոստանջյանը: Խմբակցության նիստի ընթացքում քննարկվել են Արևելյան գործընկերության անդամ երկրներում (Հայաստան, Վրաստան, Ուկրաինա, Մոլդովա, Ադրբեջան, Բելառուս) քաղաքական իրավիճակին, եվրաինտեգրման գործընթացին, Բաթումիում կայացած Արեւելյան գործընկերության անդամ երկրների ղեկավարների ընդունած հռչակագրին առընչվող հարցեր:

Ելույթներ են ունեցել նիստին ներկա բոլոր երկրների խորհրդարանական ներկայացուցիչները: Ադրբեջանի ներկայացուցչի ելույթից հետո Զարուհի Փոստանջյանը զարմանք է հայտնել, որ սաֆարովյան խայտառակություններից հետո Ադրբեջանի ներկայացուցիչը ցինիկաբար նշում է, որ Ադրբեջանը ժամանակակից տոլերանտ պետություն է, որն իբրև խրախուսում և աջակցում է մշակույթների երկխոսությանը: Զարուհի Փոստանջյանը նշել է, որ Ադրբեջանում ոտնահարվում են մարդու իրավունքները, առկա են քաղբանտարկյալներ, որոնց հարցը բարձրացվում է նաև ԵԽԽՎ-ում, իսկ մարդասպան Սաֆարովի հերոսացումն ընդհանրապես խոսում է Ադրբեջանի հակաիրավական, ռազմատենչ, ապակառուցողական, ատելություն սերմանող հայատյաց քաղաքականության մասին: Նա առաջարկել է, որ ԵԺԿ-ն ևս իր քաղաքական գնահատականը տա տեղի ունեցածին: Արտակ Զաքարյանն իր եզրափակիչ խոսքում նշել է, որ բոլոր միջազգային հեղինակավոր կազմակերպություններն անդրադարձել ու քննադատել են տեղի ունեցածը և կարևորել, որ Եվրանեսթ ԽՎ-ը ևս իր առաջիկա լիագումար նիստում անդրադառնա այդ դատապարտելի ու եվրոպական հանրույթի կողմից անընդունելի երևույթին: