Բիձինա Իվանիշվիլին առաջինը հայերի հետ է հանդիպել

Վրաստանի խորհրդարանական ընտրություններում հաղթանակած «Վրացական երազանք» կոալիցիայի առաջնորդ Բիձինա Իվանիշվիլին Թբիլիսիի «Քորթիարդ Մարիոտ» հյուրանոցում շուրջ յոթ տասնյակ վիրաահայերի հետ հոկտեմբերի 13-ին ունեցած հանդիպման ժամանակ լրջորեն անդրադարձել է հայ համայնքի խնդիրներին: Այս մասին տեղեկացնում է «Արմենպրես»-ը` վկայակոչելով «Բազմազգ Վրաստան» կազմակերպության ղեկավար Առնոլդ Ստեփանյանին: Վերջինս շեշտել է, որ Վրաստանում դադարեցվելու է հայկական դպրոցների փակումը:

«Նախ պիտի նշեմ, որ այս ձևաչափով Բիձինա Իվանիշվիլին ազգային փոքրամասնություներից առաջինը հայերի հետ է հանդիպել և մեծ ուշադրություն դարձրել հայկական համայնքի հիմնախնդիրներին՝ հատկապես լեզվի, մշակույթի և դպրոցների հարցում»,- ասաց Առնոլդ Ստեփանյանը:

Հայ համայնքի ներկայացուցիչների հետ հանդիպումը կայացել է հոկտեմբերի 13-ին Թբիլիսիի «Քորթիարդ Մարիոտ» հյուրանոցում՝ բանաստեղծ-թարգմանիչ Գիվի Շահնազարի ընթերցողների հետ հանդիպման շրջանակներում: Հանդիպումը, որ նախաձեռնել էր Վրաստանի մշակույթի նախարարի թեկնածու Գուրամ Օդիշարիան, խորհրդանշորեն համընկել է Հայոց Եկեղեցու կողմից գրերի գյուտի նշանավորման օրվա և թարգմանչաց տոնին: Միջոցառման կազմակերպմանն աջակցել էր «Վրացական երազանք» կոալիցիան՝ կուսակցության անդամ Գոգա Էլիբեկովի անմիջական մասնակցությամբ:

Հանդիպմանը ներկա էին Վրաստանի վարչապետի թեկնածու Բիձինա Իվանիշվիլին, Վրաստանի մշակույթի նախարարի թեկնածու Գուրամ Օդիշարիան, Վրաստանի պատժակատարողական և իրավաբանական հարցերով նախարարի թեկնածու Սոզար Սուբարը, Հայ Առաքելական Ուղղափառ Սուրբ Եկեղեցու Վիրահայոց Թեմի առաջնորդ Գերաշնորհ Տեր Վազգեն եպիսկոպոս Միրզախանյանը, «Վրացական երազանք» կուսակցությունից Վրաստանի խորհրդարանի պատգամավորության թեկնածուներ Յուրի Մեչիտովը և Ռուսլան Պողոսյանը, հայ և վրաց գրականասերներ: Միջոցառումն ընթացել է փոխադարձ ըմբռնման ջերմ մթնոլորտում: