Ադրբեջանի ԱԳՆ-ն պատասխանել է Փաշինյանի առաջարկին. հայտարարություն

«Հայաստանը պետք է վերջ դնի 2020-ի նոյեմբերին ստորագրված եռակողմ հայտարարությամբ ստանձնած իր պարտավորություններից խուսափելու կեղծ պատրվակներին»:

Այդ մասին ասված է Ադրբեջանի արտգործնախարարության հայտարարության մեջ՝ ի պատասխան «Զանգեզուրի միջանցքի» կապակցությամբ Հայաստանի վարչապետ Նիկոլ Փաշինյանի հրապարակման:

«Հայաստանը պետք է վերջ դնի 2020թ. նոյեմբերին ստորագրված եռակողմ հայտարարության համաձայն «Զանգեզուրի միջանցքով» ավտոճանապարհներն ու երկաթուղիները միացնելու պարտավորություններից խուսափելու կեղծ պատրվակներին: Երեք անցակետերի անիրատեսական տարբերակի առաջ քաշելը, անտեսելով 20 ամիս տևած քննարկումները, սխալ քաղաքականություն է»,- ասված է հայտարարության մեջ:
 
Հիշեցնենք, որ Նիկոլ Փաշինյանը իր թվիթերյան միկրոբլոգում գրառում է արել․ «Արևելյան Ադրբեջանի և Նախիջևանի միջև կապն ապահովելու նպատակով հայ-ադրբեջանական սահմանին 3 անցակետ բացելու մասին ՀՀ կառավարության որոշման նախագիծը մի քանի ամիս է՝ պաշտոնապես շրջանառվում է։ Հայաստանի կառավարությունը սպասում է Ադրբեջանի դրական արձագանքին»: