Հանրապետականները քննադատել են Ամերիկյան վարչակազմին՝ Իրաքից ԱՄՆ-ի զորքերը դուրս բերելու համար

ԱՄՆ–ի նախագահական ընտրությունների հանրապետական թեկնածուները քննադատել են Իրաքից ամերիկյան զորքերի լրիվ դուրսբերումը, որի որոշումն ընդունվել էր նախագահ Օբամայի կողմից։

Ամերիկյան «CBS News»–ի հաղորդմամբ՝ նախօրեին Ներկայացուցիչների պալատի նախկին խոսնակ՝ նախագահի հանրապետական թեկնածու Նյուտ Գինգրիչը հայտարարել է, որ Իրաքից ամերիկյան զորքերի վերջնական դուրսբերումն ԱՄՆ–ի համար քաղաքական վակուում կառաջացնի, որն էլ կարող է հանգեցնել այդ տարածաշրջանում Իրանի ազդեցության աճին։ Բացի այդ, ըստ նրա՝ զորքերի վերջնական դուրսբերումը կապակայունացնի Իրաքը։ 

Մասաչուսեթսի նախկին նահանգապետ՝ Միթ Ռոումնին դեկտեմբերի 18-ին «Fox News»-ին տված հարցազրույցում ասել է, որ Օբաման մեծ պատասխանատվություն է ստանձնել՝ Իրաքից ԱՄՆ–ի զորքերի լրիվ դուրսբերման հարցում։ Ըստ Ռոումնիի՝ ԱՄՆ վարչակազմը Իրաքում պետք է թողներ առնվազն 10–30 հազ. զորք։ 

Նախագահի մեկ այլ հանրապետական թեկնածու Ռոն Փոլը նույնպես քննադատել է Իրաքից ԱՄՆ–ի զորքերի վերջնական դուրսբերման մասին նախագահ Օբամայի կայացրած որոշումը։ ԱՄՆ–ի նախագահի հանրապետական թեկնածուների մեծ մասի ընդհանուր դիրքորոշումն այդ հարցի վերաբերյալ նույնն են, սակայն այլ են նրանց տեսակետները։ Ռոն Փոլի կարծիքով Միացյալ նահանգներն իր զորքերը պետք է դուրս բերի բոլոր այն երկրներից, որտեղ նրանք հիմա գտնվում են։ 

Ամերիկյան զորքերի վերջին էշելոնն Իրաքից դուրս եկավ նախօրեին՝ վաղ առավոտյան։ Այնտեղ են մնացել միայն 157 հոգանոց զորախումբ, ովքեր պետք է վարժեցնեն իրաքցի զինվորներին և ռազմածովային ուժերի մի փոքր խումբ, որոնք պետք է պաշտպանեն Իրաքում ամերիկացի դիվանագետների անվտանգությունը։