Պարգևներ՝ հայանպաստ գործունեության համար

ՀՀ կրթության և գիտության նախարար Արմեն Աշոտյանն այսօր ընդունել է Հայաստանում գտնվող Ավստրիայի կրթության, գիտության և մշակույթի ոլորտի մի խումբ ներկայացուցիչների: Ողջունելով հյուրերին՝ նախարարը հույս է հայտնել, որ Հայաստան կատարած այցելությունը նոր լիցք կհաղորդի հայ-ավստրիական հարաբերություններին: «Շնորհակալություն յուրաքանչյուրիդ՝ ձեր ջանքերի համար, որ գործադրում եք մեր երկիրն Ավստրիայում ավելի ճանաչելի դարձնելու, հայագիտական հետազոտություններին աջակցելու և Լեռնային Ղարաբաղի Հանրապետությունը հատուկ ուշադրության կենտրոնում պահելու համար:

Վստահ եմ, որ Արցախում ձեզ մեծ բացահայտումներ են սպասում՝ Արցախը, իհարկե, Հայաստան է, բայց հատուկ Հայաստան»,-դիմելով հյուրերին՝ նշել է Արմեն Աշոտյանը:

Շնորհակալություն հայտնելով ընդունելության համար՝ Ավստրիայի գիտության և մշակույթի նախարարության 1992-2011թթ. գրքերի հրատարակչության բաժնի ղեկավար Ալոիս Զյոհնին նշել է, որ այցելության նպատակը Հայաստանի պատմությանը և մշակույթին ավելի խորությամբ ծանոթանալն է՝ ընդգծելով, որ ավստրիացիները Հայաստանի մշակույթին ծանոթ են նախևառաջ Վիեննայի Մխիթարյան միաբանության միջոցով:

Ավստրիայի գիտության և մշակույթի նախկին նախարար տիկին Էլիզաբեթ Գեհրերին իր խոսքում կարևորել է կրթության, գիտության և հետազոտությունների ոլորտներում հայ-ավստրիական կապերի ընդլայնումը:

Հանդիպման ավարտին կրթության, գիտության ոլորտում ներդրած ավանդի և հայանպաստ գործունեության համար Ավստրիայի գիտության և մշակույթի 1995-2007թթ. նախարար տիկին Էլիզաբեթ Գեհրերին և նույն նախարարության 1992-2011թթ. գրքերի հրատարակչության բաժնի ղեկավար պարոն Ալոիս Զյոհնին նախարար Արմեն Աշոտյանը պարգևատրել է ՀՀ կրթության և գիտության նախարարության բարձրագույն պարգևով՝ «Ոսկե հուշամեդալով»: