Սիրիայում ցուցարարներն արդեն Ասադին են պաշտպանում

Ինչպես հաղորդում է սիրիական «SANA» գործակալությունը, դեկտեմբերի 19-ին Դամասկոսում մեծ ցույց է տեղի ունեցել` ի պաշտպանություն Սիրիայի նախագահ Բաշար ալ Ասադի։

Հարյուր հազարավոր քաղաքացիներ հավաքվել են մայրաքաղաքի Սաբաա Բահրատ հրապարակում՝ իրենց աջակցությունը հայտնելով Ասադին և բողոքելով այլ երկրների՝ Սիրիայի ներքին գործերին միջամտության դեմ։ Ցուցարարները երգել են հայրենասիրական երգեր, հնչեցրել կոչեր։

Ցուցարարներին վրդովեցրել է Արաբական լիգայի անդամ երկրների դիտորդական խմբերին ընդունելու՝ Սիրիայի կառավարության որոշումը։ Հիշեցնենք, որ նախկինում Ասադի վարչակազմը կտրականապես հրաժարվում էր իր տարածք թողնել այդ խմբերին։

 Սիրիական «al-Watan» պարբերականը հայտնում է, որ Արաբական Լիգան արձագանքել է պաշտոնական Դամասկոսի՝ արձանագրության մեջ առաջարկված փոփոխությունների մեծ մասին։ Այդ կետերը հիմնականում առնչվում են ազգային ինքնիշխանությունը հարգելու պահանջին։ Դրանով սիրիական իշխանությունները խափանում են Սիրիայի ներքին ճգնաժամը միջազգայնացնելու՝ որոշ արաբական երկրների կողմից սպասելի ցանկացած փորձ։