Մեծ Բրիտանիայի թագավոր Չարլզ III-ը նոր վարչապետ է նշանակել Ռիշի Սունակին

Մեծ Բրիտանիայի թագավոր Չարլզ III-ը Միացյալ Թագավորության վարչապետ է նշանակել իշխող Պահպանողական կուսակցության ղեկավար Ռիշի Սունակին։ Այս մասին հայտնում է Sky News հեռուստաալիքը։

Ռիշի Սունակը պաշտոնապես դարձավ վարչապետ Բուքինգհեմյան պալատում՝ Չարլզ III թագավորի  հետ ունեցած հանդիպումից հետո:

Նոր վարչապետին հանձնարարվել է նաև կառավարություն ձևավորել։

Ավելի վաղ Մեծ Բրիտանիայի թագավոր Չարլզ III-ը պաշտոնապես ընդունել էր վարչապետ Լիզ Թրասի հրաժարականը։ Ըստ պալատի հայտարարության՝ թագավորը «ողորմությամբ» ընդունել է նրա հրաժարականը։

Մինչ այս, Սունակը հայտարարվել էր՝ որպես իշխող Պահպանողական կուսակցության առաջնորդ այն բանից հետո, երբ մնացած բոլոր հավակնորդները լքեցին այդ պաշտոնի համար պայքարը։ Քանի որ «պահպանողականները» իշխանության մեջ են, ֆինանսների նախկին նախարարն ինքնաբերաբար դառնում է կառավարության ղեկավար։