Վրաց պատգամավորի մահվան նախնական վարկած է առաջ քաշվել

Այսօր իր սեփական բնակարանում մահացած հայտնաբերված պատգամավոր Իրակլի Խախուբիայի դին տեղափոխվել է Փորձաքննությունների ազգային բյուրո, գրում է Newsgeorgia-ն։

Նախնական տվյալներով՝ 51-ամյա Խախուբիան ինքնասպանություն է գործել՝ կրակելով ինքն իրեն։ Լրատվամիջոցները հայտնում են, որ կինը կրակոցի ձայնը լսել է առավոտյան։ Բնակարանում ատրճանակ է հայտնաբերվել։ Հարուցվել է քրեական գործ «ինքնասպանության հասցնելու» հոդվածով։

«Վրացական երազանք» կուսակցության նախագահ Իրակլի Կոբախիձեն և խորհրդարանական խմբակցության նախագահ Մամուկա Մդինարաձեն արդեն այցելել են Խախուբիայի տուն և զրուցել մահացած պատգամավորի ընտանիքի անդամների հետ։

Խախուբիա ընտանիքի անդամները մամուլի ներկայացուցիչների հետ դեռ չեն խոսել։

Ըստ հիմնական վարկածի՝ Իրակլի Խախուբիան ինքնասպանություն է գործել ողբերգական հանգամանքներում որդու մահվան հետևանքով առաջացած ծանր հոգեբանական վիճակի ֆոնին։ 21-ամյա Բեկա Խախուբիան մահացել է 2017 թվականի մայիսին՝ Գորիի մոտ տեղի ունեցած ավտովթարից։ Արագության գերազանցման պատճառով՝ ոստիկանները փակել են նրա ճանապարհը, երիտասարդը փորձել է շրջանցել արգելքը, մխրճվել է բեռնատարի մեջ ու տեղում մահացել։

 Խախուբիան Վրաստանի խորհրդարանի պատգամավոր էր իշխող «Վրացական երազանք» կուսակցությունից։