Եթե մտադիր չէ միջուկային զենք կիրառել, ինչո՞ւ է շարունակ խոսում այդ մասին. Բայդենը չի հավատում Պուտինին
Համաշխարհային Մամուլ
ԱՄՆ նախագահ Ջո Բայդենը թերահավատություն է հայտնել Ռուսաստանի նախագահ Վլադիմիր Պուտինի այն մեկնաբանության առնչությամբ, որ նա մտադիր չէ միջուկային զենք կիրառել Ուկրաինայում։ Այս մասին հայտնում է Reuters-ը։
Պուտինն ավելի վաղ իր ելույթում նսեմացրել էր Արևմուտքի հետ միջուկային դիմակայությունը՝ պնդելով, որ Ռուսաստանը չի սպառնում միջուկային զենք կիրառել և միայն պատասխանել է արևմտյան առաջնորդների միջուկային «շանտաժին»:
«Եթե մտադիր չէ, ինչո՞ւ է շարունակում այդ մասին խոսել, ինչո՞ւ է խոսում տակտիկական միջուկային զենքի կիրառման հնարավորության մասին։ Նա շատ վտանգավոր է»,- ասել է Բայդենը:
Պուտինը և ռուս այլ պաշտոնյաներ վերջին շաբաթներին բազմիցս ասել են, որ Ռուսաստանը կարող է միջուկային զենք օգտագործել իր տարածքային ամբողջականությունը պաշտպանելու համար։ Սա Արևմուտքը մեկնաբանել է՝ որպես անուղղակի սպառնալիք։
Ավելի վաղ CNN-ին տված հարցազրույցում Սպիտակ տան ազգային անվտանգության խոսնակ Ջոն Քիրբին ասել էր, որ միգուցե Ռուսաստանը դիտարկում է, այսպես կոչված, «կեղտոտ ռումբի» կիրառումը և պատրվակ է ստեղծում Ուկրաինային մեղադրելու համար։ «Բայց Միացյալ Նահանգները դեռևս որևէ նշան չի տեսել, որ դա հաստատ այդպես է»,- ասել է Քիրբին:
ՈՒՂԻՂ ԵԹԵՐ
Ամենադիտված 
«Մարինան նույնպես չկարողացավ հաղթել այդ չարիքին». Իրինա Թովմասյանը ցավալի լուր է հայտնել
