ԱՄՆ-ն յոթերորդ անգամ աշխարհի ամենահզոր երկիրն է ճանաչվել

ԱՄՆ-ը յոթերորդ անգամ աշխարհի ամենահզոր երկիրն է ճանաչվել՝ ըստ Փենսիլվանիայի համալսարանի Ուորթոնի դպրոցի եւ US News & World Report-ի վերջին վարկանիշի:

ԱՄՆ-ը նաեւ վերադարձել է լավագույն երկրների հնգյակ՝ 2021 թվականի վեցերորդ տեղից բարձրանալով չորրորդ տեղ: Նրան շրջանցել են Շվեյցարիան, Գերմանիան եւ Կանադան, իսկ Շվեդիան բարձրացել է չորս հորիզոնականով եւ զբաղեցրել է հինգերորդ տեղը:

Վարկանիշը հաշվարկվել է 36 երկրների ավելի քան 17 000 մարդկանց պատասխանների հիման վրա:

ԱՄՆ-ի ուժեղ աշխատաշուկան այս տարի նաեւ բարձրացրել է ամերիկացիների երջանկության մակարդակը: 2021 թվականին հարցվածների միայն 4 տոկոսն է ասել, որ իրենք լավ աշխատաշուկա ունեն, սակայն այս տարի այդ թիվը հասել է 96 տոկոսի։

Չնայած աշխատանք գտնելու մեծ հնարավորություններին, ԱՄՆ-ն, այնուամենայնիվ, կյանքի ընդհանուր որակով 20-րդ տեղից իջել է 21-րդ տեղ: Անկման հիմնական պատճառն այն է, որ հարցվածների միայն 11 տոկոսն է ԱՄՆ-ն անվտանգ համարում, ինչը զգալի անկում է նախորդ տարվա 38 տոկոսից: «Լավ հայտնի է, որ մենք մարդկանց թույլ ենք տալիս զենք ունենալ, եւ ամեն անգամ, երբ ԱՄՆ-ում հրաձգություն է լինում, դա մեծ արձագանք է գտնում»,- ասել է մարքեթինգի պրոֆեսոր Դեւիդ Ռեյբշտեյնը, որն իրականացրել է հետազոտությունը,- Դպրոցներում տեղի ունեցած հրաձգությունների եւ քաղաքներում արձանագրված բոլոր հանցագործությունների պատճառով երկիրը չի համարվում անվտանգ, ինչը հանգեցրել է կյանքի որակի անկման»։

«Հրազենային զենքի կիրառմամբ բռնության արխիվ» բարեգործական կազմակերպության տվյալներով՝ հոկտեմբերի 20-ի դրությամբ երկրում 546 զանգվածային հրաձգություն է տեղի ունեցել։

ԱՄՆ-ի համեմատ հարցվածների 95 տոկոսն անվտանգ է համարում Շվեյցարիան, որն աշխարհի լավագույն երկիր է ճանաչվել։