«ՉԻ». Բլից. Գործով պատգամավոր

«ՉԻ»-ն գրում է. «Ավարտվեց Ազգային ժողովի չորրորդ գումարման 10-րդ նստաշրջանը: Շուտով այս խորհրդարանը ևս կանցնի պատմության գիրկը: Ովքե՞ր կհայտնվեն նոր խորհրդարանում, դեռևս պարզ չէ: «ՉԻ»-ն փորձեց մի քանի հարցեր ուղղել գործարարի համբավ ունեցող պատգամավորներին, պարզելու, թե նրանցից ովքե՞ր են «հայտ» ներկայացնելու պատգամավորական մանդատի համար՝ նկատի ունենալով Սերժ Սարգսյանի հրապարակային հայտարարություններն այն մասին, թե խորհրդարանում այլևս գործարարներ չեն լինելու:

ԽԱՉԻԿ ՄԱՆՈՒԿՅԱՆ.ՀՀԿ

- Պարոն Մանուկյան, Դուք հաջորդ գումարման խորհրդարանում Ձեզ տեսնում եք, թե՞ ոչ:

- Եթե ժողովուրդն ընտրի՝ կլինեմ:

- ՍերԺ Սարգսյանը հայտարարել էր, որ խորհրդարանում գործարարներ չեն լինելու, այդ դեպքում ինչպե՞ս եք դա պատկերացնում:

- Հիմա ո՞ւմ հետ ես խոսում, գործարարի՞...

- Դուք բիզնեսով չե՞ք զբաղվում:

- Ո՞վ ասեց: Ես վաղուց անցել եմ էդ էտապը: Իմ փոխարեն մարդիկ են աշխատում: Եթե օրենքը ըտենց ա գրում, ըտենց էլ արել ենք: Էդքան չե՞նք հասկանում, որ օրենքի ձևով պտի անենք: Տվել ենք մարդկանց, մարդիկ կառավարում են:

- Փաստորեն, ձևականորեն Դուք ձեռնարկատեր չեք:

- Բայց ը՞նչի ձևականորեն: Տվել ենք մարդկանց, մարդիկ կառավարում են:

-Այսինքն՝ Ձեզ գործարար չե՞ք համարում:

- Էությամբ գործարար եմ: Բայց դե ֆակտո պատգամավոր եմ:

ԱՇՈՏ ԱՐՍԵՆՅԱՆ. ՀՀԿ

- Հաջորդ խորհրդարանում լինելո՞ւ եք:

- Իհարկե:

- Բայց Սերժ Սարգսյանը հայտարարել էր, որ գործարարներ չեն լինելու:

- Ես գործարար չեմ:

- Իսկ «Ջերմուկ-Գրուպը» ո՞ւմ է պատկանում:

- Ես հիմնադիր նախագահն եմ:

- Իրականում գործարար չե՞ք :

- Ո՛չ:

ՄԻՔԱՅԵԼ ՄԱՆՈՒԿՅԱՆ. ՀՅԴ

- Բա ես գործարա՞ր եմ:

- Գործարար չե՞ք։

- Իհարկե ոչ:

ԳՐԻԳՈՐ ՄԱՐԳԱՐՅԱՆ.ՀՀԿ

- Ընտրությունների արդյունքները կորոշեն, թե լինելու եմ արդյո՞ք Ազգային Ժողովում: Այս նույն հարցը արդեն չորրորդ անգամ են ինձ տալիս: Ես գործարար չեմ, գործարարությամբ չեմ զբաղվում: Նորից եմ կրկնում, եթե խոսքը վերաբերում է «Բելլաջո» ռեստորան-հյուրանոցային համալիրին, ապա դա մեր ընտանիքի սեփականությունն է և դրանով զբաղվում է իմ եղբայրը:

ԱՐԱԳԱԾ ԱԽՈՅԱՆ.ԲՀԿ

- Կլինեմ Ազգային ժողովում, թե չէ, դա որոշում է մեր խորհուրդը:

- Բայց Սերժ Սարգսյանը հայտարարել էր, որ գործարարներ չեն լինելու Ազգային ժողովում:

- Ես էլ եմ համաձայն, որ գործարարներ չլինեն: Բայց սեփականատերեր կարան չէ՞ լինեն: Այսինքն բոլոր պատգամավորները պետք ա ոչինչ չունենա՞ն, այսինքն՝ տուն- տեղ...

- Բիզնեսով չպետք է զբաղվեն:

- Ունեցվածք կարող են ունենալ, դա ուրիշ բան ա, բայց բիզնեսը կառավարման կարող են հանձնել:

- Պատգամավորը, եթե մանդատ չունենա, կկարողանա՞ հարկային դաշտում իրեն պաշտպանված զգալ:

- Ես մի տարի է Ազգային ժողովում եմ ու ասեմ, որ ոչինչ չի փոխվել էն ժամանակվա ու հիմիկվա միջև: Արտառոց ոչինչ տեղի չի ունեցել: Պատկերացնու՞մ եք, ես զարմանում եմ, ո՞վ է մտցրել մարդկանց մեջ, որ հարկային դաշտում և բիզնեսի հետ կապված ինչ-որ բաներ թաքցնելու համար ուզում են պատգամավոր դառնալ ու Ազգային Ժողովում հայտնվել: Լրիվ սխալ պատկերացում է:

ՆԱՀԱՊԵՏ ԳԵՎՈՐԳՅԱՆ. ՀՀԿ

- Պարոն Գևորգյան Դուք լինելո՞ւ եք հաջորդ գումարման խորհրդարանում:

- Իհարկե լինելու եմ:

- Իսկ Սերժ Սարգսյանը հայտարարել էր, որ Ազգային ժողովում այլևս գործարարներ չեն լինելու:

- Անցի, անցի, արդեն պրովոկացիոն հարցեր ես տալիս...

ՄԵԼԻՔ ՄԱՆՈՒԿՅԱՆ. ԲՀԿ

- Պարոն Մանուկյան Դուք լինելո՞ւ եք հաջորդ խորհրդարանում:

- Դեռ չեմ որոշել:

- Իսկ ինչպե՞ս եք վերաբերվում Սերժ Սարգսյանի այն հայտարարությանը, որ Ազգային ժողովում գործարարներ չեն լինելու:

- Շատ լավ: Գործարարին պետք չի նայել որպես թշնամի, որպես հարձակվող: Գործարարը էս րոպեին աշխատատեղ ստեղծողն ա: Նա ևս պետք է մասնակցի օրենսդրական աշխատանքին:

ԳԱԳԻԿ ԲԱՂԴԱՍԱՐՅԱՆ. ՕԵԿ

- Իհարկե հայտ կներկայացնեմ, իսկ կլինեմ խորհրդարանում, թե՝ ոչ, ընտրողը պետք է որոշի:

- Դուք տեղյա՞կ եք Սերժ Սարգսյանի այն հայտարարությանը, որ Ազգային ժողովում գործարարներ չպետք է լինեն:

- Ես համաձայն եմ և համամիտ եմ այդ որոշման հետ, որովհետև իսկապես գործարարները պետք է զբաղվեն ձեռնարկատիրությամբ: Իսկ ՕԵԿ-ում կլինեն այն մարդիկ, ովքեր չեն զբաղվում բիզնեսով:

- Դուք գործարար չե՞ք:

- Ոչ: Այն օրվանից, երբ ստացա Ազգային ժողովի պատգամավորի մանդատը, իմ գործարարի լիազորությունները դադարեցրի: Բոլոր ձեռնարկությունները հայտարարագրումով հանձնեցի կառավարման:

Հ.Գ. ԱԺ պետաիրավական հանձնաժողովի անդամ Ռաֆիկ Պետրոսյանի հետ զրույցի ժամանակ, երբ տեղեկացրինք, որ գործարարի համբավ ունեցող գրեթե բոլոր պատգամավորները հրաժարվում են, որ իրենք գործարար են, նա նշեց. «Հո իրենց հրաժարվելով չի: Բոլորն էլ գիտեն՝ ո՞վ է գործարար, ով՝ ոչ: Դեռևս չորս տարի առաջ բոլոր գործարարները օրենքի հիման վրա իրենց ունեցվածքը հավատարմագրային կառավարման հանձնեցին այլ անձանց, այսինքն՝ ուրիշներին ձևակերպեցին որպես տնօրեններ, բայց դա չի նշանակում, որ իրենք գործարար չեն»: