Մեր քաղաքականության վրա ՌԴ-ի կամ ԱՄՆ-ի դեսպանի ազդեցությունը զրոյական է. ՀՀ ԿԲ նախագահ

ԱՄՆ-ի, Ֆրանսիայի, ՌԴ-ի, Իտալիայի և այլ երկրների դեսպանների հետ հանդիպումների դեպքում պարիտետային սկզբունքը պահպանվում է, դրանք պարբերական հանդիպումներ են, որոնք տեղի է ունենում տարին մեկ կամ երկու անգամ: Այս մասին այսօր՝ նոյեմբերի 1-ին, մամուլի ասուլիսի ժամանակ նշեց ԿԲ նախագահ Մարտին Գալստյանը՝ պատասխանելով մամուլում տարածված լուրի մասին հարցին, ըստ որի՝ ԱՄՆ դեսպանն հաճախ է այցելում ԿԲ՝ հակառուսական պատժամիջոցների լոբբինգի համար:

ԿԲ նախագահը հայտնեց, թե իր կարծիքով ՌԴ դեսպանի հետ ավելի շատ է հանդիպել, քան ԱՄՆ դեսպանի հետ. «Մեր քաղաքականության վրա ազդեցության տեսանկյունից այդ ազդեցությունը 0-ական է: Կենտրոնական բանկն անկախ մարմին է, որն այս երկրում իրականացնում է իր դրամավարկային քաղաքականությունը՝ ի շահ Հայաստանի քաղաքացու:

Բովանդակային առումով ի սկզբանե մի բան ենք ասել, որ պատժամիջոցներին վերաբերելու ենք շատ լուրջ՝ ոչ թե պատժամիջոցները հակառուսական են, կամ ռուսական պատժամիջոցները հակաամերիկյան են, այլ մենք գործում ենք այն սկզբունքով, որ մենք հետևում ենք պատժամիջոցներին և զերծ ենք մնում դրանցում մատնանշված ֆիզիկական թե իրավաբանական անձանց հետ համագործակցությունից»,-ասաց ԿԲ նախագահը:

Նրա խոսքով՝ ՀՀ բանկերը ևս, իրենց ռիսկերը հաշվի առնելով, վարում են իրենց քաղաքականությունը և ԿԲ-ի կողմից բանկերին ուղղորդելու քաղաքականություն չկա. «Բանկերը ինքնուրույնաբար, հաշվի առնելով իրենց ռիսկերը, որոշումներ են կայացնում այս կամ այն գործընկերոջ, կամ ուղղության հետ առնչվելու կամ չառնչվելու վերաբերյալ»,-ընդգծեց Մարտին Գալստյանը: