Շաքարային դիաբետից և ճարպակալումից խուսափելու համար անհրաժեշտ է շատ քնել

Քնի անբավարարությունը վատ է անդրադառնում ոչ միայն ուղեղի աշխատանքի, այլև նյութափոխանակության վրա. գրում է science.compulenta-ն:

Չիկագոյի համալսարանի բժշկական կենտրոնի հետազոտողները փորձ են անցկացրել՝ խնդրելով մի քանի առողջ երիտասարդ մարդկանց 4 գիշեր անընդմեջ քնել 8.5 ժամ, իսկ այնուհետև՝ մեկ ամիս անց, 4 օրով կրճատել քունը մինչև 4.5 ժամ: Երկու դեպքում էլ չորսօրյա փորձին հաջորդող առավոտյան փորձի մասնակիցներն անցել են ինսուլինադիմադրողականության թեսթավորում:

Հետազոտողները Annals of Internal Medicine ամսագրում հրապարակել են իրենց փորձի արդյունքները: Պարզվում է, որ եթե մարդ քիչ է քնում, ապա ինսուլինի նկատմամբ զգայունությունը նվազում է մինչև 16 %: Ամսագիրը հիշատակում է, որ ինսուլինի նկատմամբ զգայունության անկումը շաքարային դիաբետի հիմնական նախանշաններից է: Հենց այդ նախանշաններն են ի հայտ գալիս այն մարդկանց մոտ, ովքեր տառապում են ճարպակալմամբ և շաքարային դիաբետով:

Հետազոտողներն ընդունում են, որ այս փորձը բավականին նախնական բնույթ է կրում, քանի որ նրան մասնակցել է ընդամենը 7 մարդ, սակայն ամեն դեպքում սա այն եզակի հետազոտություններից է, որոնք փորձում են կապ գտնել քնի և նյութափոխանակության միջև: