Պուտինն այն քաղաքական գործիչը չէ, որը հետքայլ կանի. Էրդողան

Թուրքիայի նախագահ Ռեջեփ Թայիփ Էրդողանը հայտարարել է, որ Գերմանիայի կանցլեր Օլաֆ Շոլցը փոխել է իր դիրքորոշումը Ռուսաստանի առաջնորդ Վլադիմիր Պուտինի նկատմամբ։ Նրա խոսքերը հայտնում է Daily Sabah-ը։

Էրդողանի խոսքով՝ ընդամենը մեկ ամիս առաջ Շոլցը «բոլորովին այլ դիրքորոշում է որդեգրել» Ռուսաստանի նկատմամբ։ Սակայն այժմ գերմանացի քաղաքական գործիչը կարծում է, որ անհրաժեշտ է ընդհանուր լեզու գտնել ՌԴ նախագահի հետ։

Haber հեռուստաալիքի հետ զրույցում Էրդողանն ասել է, որ աշխարհի առաջնորդները սխալ վերաբերմունք ունեն Պուտինի նկատմամբ։ Նրա խոսքով՝ բոլորը, ում հետ ինքը խոսել է Պրահայում Եվրոպական քաղաքական համայնքի գագաթնաժողովի շրջանակներում, հակադրվել են Ռուսաստանի ղեկավարին։ Միաժամանակ, նա նշել է, որ Պուտինն այն քաղաքական գործիչը չէ, որը «հետքայլ կանի իր վրա ճնշում գործադրելու հետևանքով»։ «Լինելով աշխարհի ամենահարգված երկրներից մեկը, ինչպիսին Ռուսաստանն է, դուք ոտքի կկանգնեի՞ք և այո ասեիք նման հարձակումներին: Դա անհնար է»,- ընդգծել է Թուրքիայի նախագահը։